काठमाडौं । नेपालमा कोरोना भाइरसको संक्रमण फैलिँदै गएको र विभिन्‍न जिल्लामा लकडाउन जारी गरिएपछि केही दिनका लागि स्थगित गरिएको उद्धार उडान फेरि सुरु हुने भएको छ । 

मंगलबार कुवेतमा रहेको नेपाली दूतावासले कुवेतमा कोरोनाको कारण समस्यामा परेर नेपाल फर्किनै पर्ने अवस्थामा रहेका नेपालीहरुलाई उद्धार गर्नको लागि २ वटा चार्टर उडान तालिका सार्वजनिक गरेको छ ।

दूतावासका अनुसार नेपाल एयरलाइन्सको चार्टर्ड जहाजले भदौ १२ र १५ गते काठमाडौंका लागि उडान भर्नेछ ।

यसअघि दूतावासबाट विभिन्न मितिमा प्रकाशित सूचिमा नाम समावेश भएर टिकट खरिद र बुकिङ गरेका यात्रुहरुलाई रिकन्फर्मृेसनको लागि सम्बन्धित एयरलाइन्समा सम्पर्क गर्न दूतावासले स्वदेश फर्कने नेपालीहरुलाई अनुरोध गरेको छ । 

त्यस्तै कोरोनाको संक्रमण नभएको नेगेटिभ रिपोर्ट अनिवार्य रुपमा साथमा राख्नुपर्नेछ । कोरोनाको कारण समस्यामा परेर कुवेतबाट हालसम्म ६ हजार ३२९ जना नेपालीहरु स्वदेश फर्किएका छन् ।