काठमाडौं । नेपालमा कोरोना भाइरसको संक्रमण फैलिँदै गएको र विभिन्‍न जिल्लामा लकडाउन जारी गरिएपछि केही दिनका लागि स्थगित गरिएको उद्धार उडान फेरि सुरु हुने भएको छ । 

सोमबार मलेसियामा रहेको नेपाली दूतावासले मलेसियामा कोरोनाको कारण समस्यामा परेर नेपाल फर्किनै पर्ने अवस्थामा रहेका नेपालीहरुलाई उद्धार गर्नको लागि चार्टर उडान तालिका सार्वजनिक गरेको छ । 

भदौ १२ गते नेपाल एयरलाइन्स र हिमालय एयरलाइन्सको एक-एक वटा चार्टर उडान गर्ने भएका छन् भदौ १३ गते नेपाल एयरलाइन्स, हिमालय एयरलाइन्स र मालिन्दो एयरलाइन्सको एक-एक गरी जम्मा ५ उडान हुने भएका छन् । 

उक्त उडानमा यसअघि स्वदेश फर्किनको लागि टिकट काटेकाहरु मुख्य प्राथमिकतामा हुने भएकोले भदौ ३, ४ र ५ गतेको लागि टिकट लिइसकेका यात्रुहरुले आफ्नो एयरलाइन्स वा ट्राभल एजेन्सीमा सम्पर्क गरी आफ्नो उडान सुनिश्चित गर्न दूतावासले आग्रह गरेको छ । 

हवाई यात्राको समयमा कोभिड-१९ को पीसीआर नेगेटिभ रिपोर्ट भएका व्याक्तिहरुले मात्र यात्रा गर्न पाउनेछन् ।  कोभिड–१९ को पीसीआर परीक्षणबाहेक अन्य परीक्षणहरु मान्य नहुने उक्त सूचनामा उल्लेख गरिएको छ । साथै पीसीआर रिपोर्ट नेपाल पुग्‍ने दिनसम्ममा गरी सात दिन भित्रको हुनु पर्नेछ । 

पहिले पीसीआर परीक्षण गरिसकेका र नेपाल पुग्‍ने दिनसम्ममा ७ दिनभन्दा बढी भएका व्यक्तिहरुले पुन पीसीआर परीक्षण गर्नुपर्ने छ । 

यात्रा गर्नुपूर्व यहाँ लिंकमा उपलब्ध अनलाइन फाराम भरेर उक्त फाराम प्रिन्ट गरी साथै राख्नु पर्नेछ । 

हाल सम्म मलेसियाबाट ७ हजार ७९५ जना नेपालीहरु स्वदेश फर्किएका छन् भने मलेसियाबाट मात्रै स्वदेश फर्किनका लागि १६ हजार ८१४ जनाले आवेदन दिएका छन् ।