नयाँ दिल्ली । मध्य भारतको एउटा पटाका कारखानामा भएको भीषण विस्फोटनमा परी मृत्यु हुने व्यक्तिको सङ्ख्या २५ पुगेको छ ।
यस विस्फोटमा परी बुधबार १२ व्यक्तिको मृत्यु भएको जानकारी दिइएको थियो । पछि घाइतेहरुमध्ये थप १३ जनाको मृत्यु भएको थियो ।
सो विस्फोटबाट गम्भीर घाइते भएका अझै पनि सात व्यक्ति उपचारार्थ अस्पताल भर्ना भएका छन् ।
बुधबार भएको विस्फोटपछि भएको आगलागीमा जलेर अरू केही घाइते भएका र घाइतेहरूमध्ये केहीको अवस्था गम्भीर रहेको अधिकारीहरूलाई उद्धृत गर्दै विभिन्न सञ्चार माध्यमहरूले जनाएका थिए ।
भारतको मध्य भागमा पर्ने मध्य प्रदेशको बालाघाटमा रहेको कारखानामा सो घटना भएको ती सञ्चारमाध्यमहरूले जानकारी दिएका थिए ।
आगलागी भएको झन्डै दुई घण्टापछि मात्रै आगो नियन्त्रणमा आएको थियो । विस्फोटनको कारणका बारेमा अहिलेसम्म केही स्पष्ट हुन सकेको छैन । कारण अनुसन्धानरत रहेको प्रहरीले जनाएको छ ।
भारतमा कार्यस्थलमा यस्ता दुर्घटनाहरू बारम्बार भइरहेको पाइन्छ । सुरक्षाको दृष्टिले पर्याप्त सतर्कता नअपनाइएकाले यस्ता दुर्घटनाहरू बेलाबेलामा हुने गरेको अधिकारीहरुको दाबी छ । रासस/एएफपी
