काठमाडौं । अमेरिकाको फ्लोरिडा राज्यको ओरल्यान्डो सहरमा गोलीप्रहारको घटना भएको छ । उक्त घटनामा आक्रमणकारीसहित कम्तीमा छ जना व्यक्तिको ज्यान गएको बीबीसीले जनाएको छ । घटना एउटा औद्योगिक क्षेत्रभित्रको व्यस्त थलोमा घटेको थियो ।
ओरल्यान्डो सहरमा गोलीप्रहारको यो घटना पल्स नाइटक्लब हमलाको लगभग एक वर्षपछि घटेको छ । नाइटक्लब हमलामा पचास जनाको मृत्यु भएको थियो ।
प्रेस ट्रस्ट अफ इन्डियाका अनुसार फ्लोरिडा प्रशासनले गोलीप्रहार गर्ने व्यक्तिलाई दुई महिना पहिले जागीरबाट निकालिएको जनाएको छ । यही रिसमा मानसिक दृष्टिले विक्षिप्तजस्तै बनेको उक्त व्यक्तिले सोमबार ओरल्यान्डको व्यस्त व्यापारिक क्षेत्रमा अन्धाधुन्ध गोली चलाएको थियो । वरिपरिका पाँच जनालाई जथाभावी गोली हानेपछि उसले आफूलाई समेत गोली हानेको समाचार उल्लेख छ । घटनामा आक्रमणकारीसहित पाँच जनाको तत्कालै र एक जनाको अस्पताल लैजाँदै गर्दा मृत्यु भएको थियो ।