काठमाडौं । भारत उत्तरप्रदेशको बरेली बजारनजिकैको बिथरीचैनपुरमा तीव्र गतिमा आइरहेको ट्रक र रोडवेजको बस आपसमा ठोकिँदा भएको भीषण दुर्घटनामा परी २२ जनाको ज्यान गएको छ । उक्त घटनामा १५ जनाभन्दा बढी घाइते भएका छन् ।
दैनिक भास्करका अनुसार आपसमा ठोकिएपछि बस र ट्रक दुबैमा आगो लागेको थियो । आगोले गर्दा बसमा बसेका यात्रुमध्ये २२ जना जले र उनीहरूको मृत्यु भयो । घाइतेहरूलाई अस्पतालमा भर्ना गरिएको छ । दुर्घटनापछि ट्रकको ड्राइभर भागेको छ ।
समाचारअनुसार आइतबार राति झन्डै दुई बजे एनएच–२४ राजमार्गमा गोन्डा डिपोको रोडवेज बस दिल्ली आइरहेको थियो । बस गलत साइडमा थियो र अचानक लखनऊबाट आइरहेको ट्रकसँग नराम्रोसँग ठोकियो । ठोकिनासाथ बसको डिजल ट्यांकी फुट्यो र बसमा आगो सल्कियो । ट्रकमा पनि यसरी नै आगो लाग्यो । घटनाको सूचना प्राप्त हुनासाथ फायर बिग्रेडका गाडीहरू घटनास्थलमा पुगे र आगो निभाए ।
तर त्यसबेलासम्म जनधनको ठूलो क्षति भइसकेको थियो । घटनाको चार घन्टापछि जलिसकेका मृतशरीरहरूलाई बसबाट बाहिर निकालिएको थियो । तर आगोमा नराम्ररी जलेकाले मृतकहरूको पहिचान हुन सकेको छैन ।