काठमाडौं । बेलायतको म्यानचेस्टरमा भएको आततायी आक्रमणको पन्ध्र दिन पनि नपुग्दै मध्य लन्डनको लन्डन ब्रिज र बरो मार्केटमा शनिबार राति अर्को आतंककारी आक्रमण भएको छ । बीबीसीका अनुसार उक्त आक्रमणमा मर्नेको संख्या अहिलेसम्म ६ पुगेको छ । घटनामा बीसभन्दा बढी व्यक्ति घाइते बनेका छन् । बेलायती पुलिसले उक्त हमलामा संलग्न तीन जनालाई गोली हानेर मारेको जनाएको छ । यो घटनासँगै लन्डनमा तीन महिनाभित्र तीनवटा आतंककारी हमला भएका छन् । 
लन्डनमा शनिबार राति एकैसाथ तीनवटा आतंककारी घटना घटे । एउटा घटनामा लन्डन ब्रिजमा पैदल यात्रुलाई भ्यानले ठक्कर दियो । दोस्रो घटनामा बरो मार्केट जाने बाटोमा छुरा काण्ड भयो भने तेस्रो घटनामा वाक्सहलमा गोली चल्यो । 
लन्डन ब्रिजमा शनिबार राति स्थानीय समयअनुसार १० बजेर ८ मिनेटमा पैदल हिँडिरहेका यात्रीहरूलाई एउटा सेतो भ्यानले ठक्कर दिएको थियो । प्रत्यक्षदर्शीहरूले सो भ्यान पुलको फुटपाथमा चढेको बताएका छन् । यो घटनापछि उक्त इलाका र छेउको रेलवे स्टेसन बन्द गरिएको थियो । घटनामा त्यतिखेर एक जना व्यक्तिको तत्काल मृत्यु भएको थियो भने बीसभन्दा बढी घाइते भएका थिए । उता त्यसैबेला लन्डन ब्रिजबाट बरो मार्केटतिर दौडिँदै गरेका व्यक्तिहरूलाई तीन जना आतंककारीले जथाभावी छुरा रोप्न थाले भने वाक्सहलमा अज्ञात व्यक्तिले गोली चलाए । 
यो क्षेत्रमा सप्ताहान्त, विशेषगरी शनिबार राति निकै भीडभाड हुने गर्छ । पुलिसले घटनाका क्रममा कोही नदीमा खसेको हुन सक्ने आशंकाले टेम्स नदीमा डुंगा चलाएर खोजी गरिरहेको छ । प्रधानमन्त्री टेरिजा मे र लन्डनका मेयर साकिब खानलाई घटनाबारे ताजा जानकारीहरू उपलब्ध गराइएको छ । यी सबै हमलालाई बेलायती प्रधानमन्त्री टेरिजा मेले आतंककारी हमला भनेकी छन् । उनले आइतबार कोबरा समितिको आकस्मिक बैठक बोलाएकी छन् । पछिल्लो घटना र यसअघिका गम्भीर घटनाहरूले गर्दा बेलायतमा सुरक्षा स्थिति चुनौतीपूर्ण बनेको बताइन्छ ।
यसअघि बेलायतमा गत मार्च २२ मा प्यालेस अफ वेस्टमिन्स्टरनजिकै पैदल हिँडिरहेका मानिसहरूमाथि बेलायती नागरिक खालिद मसूदले कार चढाएको थियो र लगत्तै छुरा प्रहारसमेत भएको थियो । उक्त घटनामा एक पुलिसकर्मीसमेत पाँच व्यक्तिको मृत्यु भएको थियो भने झन्डै पचास व्यक्ति घाइते भएका थिए । 
२२ मेमा फेरि म्यानचेस्टर हमला भएको थियो, जसमा २२ जनाको दुःखद मृत्यु भएको थियो भने झन्डै ११६ जना घाइते भएका थिए । यो हमला २२ वर्षीय सलमान आब्दीले गरेको कुरा पुष्टि भैसकेको छ । 
बेलायतमा पटक–पटक घटेका यस्ता घटनाले विश्वका शान्तिप्रेमी नागरिकलाई चिन्तित बनाएका छन् । फ्रान्सका राष्ट्रपति इम्यानुएल म्याक्रोंले आफ्नो देश बेलायतका साथ रहेको प्रतिक्रिया दिएका छन् । त्यसैगरी अमेरिकी राष्ट्रपति ट्रम्पले अमेरिका बेलायतलाई सबै किसिमको सहयोग उपलब्ध गराउन तयार रहेको बताएका छन् ।