काठमाडौं । नई दुनियाँ दैनिकले अमेरिकी राष्ट्रपति डोनाल्ड ट्रम्पको पछिल्लो व्यक्तिगत जीवनबारे रोचक समाचार लेखेको छ । राष्ट्रपति पदको जिम्मेवारी सम्हालेपछि ट्रम्पको सार्वजनिक जीवनशैलीमा परिवर्तन आएको छ । उनी मानिसहरूदेखि टाढा हुँदैछन् । पत्रिकाले लेखेको छ, यसले गर्दा ट्रम्प निकै तनावग्रस्त छन् र उनी आफैभित्र हराएजस्ता देखिन थालेका छन् । यो अवस्था उनका लागि निकै खतरापूर्ण रहेको बताइन्छ । 
ट्रम्पका एक जना निकटवर्तीले भनेका छन्, ‘‘मैले उनलाई भावनात्मक रूपले अलग हुँदै गएको देखेको छु । उनको तौल बढिरहेको छ र उनीसँग अब त्यस्तो कुनै मान्छे छैन, जसलाई उनी विश्वास गर्न सक्छन् ।’’ 
सूत्रका अनुसार मध्यपूर्व र युरोपको यात्रा गर्नुभन्दा पहिले ट्रम्पको मूड निकै राम्रो थियो । तर त्यहाँबाट फर्केपछि ट्रम्पको दिक्दारी बढेको छ, किनभने रुस सरकारसँग गरिएको कुराकानीबारे राष्ट्रपतिका ज्वाइँ जेरेड कुश्नरमाथि आरोप लगाइएको छ । गत हप्ता वासिंगटन पोस्टले कुश्नरले सुरक्षा निगरानीदेखि पर एउटा च्यानल स्थापना गर्नका लागि रुसी राजदूतसँग भेटघाट गरेको खबर सार्वजनिक गरेको थियो ।
विगत २५ वर्षदेखि सीआइएका लागि काम गर्दै आएका एक जना सुरक्षा विश्लेषकले आफ्ना ज्वाइँले गरेको कामबारे राष्ट्रपति ट्रम्पलाई थाहा नहुने कुरा असम्भव रहेको बताएका छन् । उनले दाबी गरेका छन्, कुश्नरले राष्ट्रपतिकै तर्फबाट कुराकानी गरेका थिए ।
अहिले राष्ट्रपति ट्रम्प निकै अलोकप्रिय हेल्थकेयर सुधारको सवालमा संघर्ष गरिरहेका छन् । ट्रम्प ओबामाकेयरलाई बदल्न खोज्दैछन् । तर यसमा उनी सफल देखिएका छैनन् । यी सबै कुराले उनको तनाव बढाउँदै गएको बताइन्छ ।
यता कतिपय सञ्चारमाध्यमले अमेरिकी सिनेट ट्रम्पविरुद्ध महाभियोग लगाउने तयारीमा जुटेको बताएका छन् । समाचारअनुसार हाउस अफ रिप्रेजेन्टिभका केही सदस्यहरूले यसको तयारी गरिरहेका छन् । ट्रम्पको रिपब्लिकन पार्टीभित्रै यसबारेमा दुई गुट बनेको बताइन्छ । रुससँग ट्रम्पको सम्बन्धको समाचार आइरहेका बेला रिपब्लिकन पार्टी ट्रम्पलाई हटाएर भए पनि पार्टीलाई बचाउने निष्कर्षमा पुगन लागेको बताइन्छ ।