काठमाडौं । दुई महिना पहिले शपथग्रहण गर्ने बेला सबैले सोचेका थिए र झन्डै निश्चितजस्तै भैसकेको थियो, उत्तर प्रदेशका मुख्यमन्त्री योगी आदित्यनाथ भगवान् रामचन्द्रको दर्शन गर्न अयोध्या जानेछन् । तर त्यतिखेर उक्त कार्यक्रमलाई स्थगित गरियो र आज बुधबार योगी त्यसतर्फ जाँदैछन् ।
बीबीसीका लागि समीरात्मज मिश्रले लखनऊबाट लेखेको रिपोर्टमा भनिएको छ, योगी अयोध्यामा झन्डै नौ घन्टा बस्नेछन् र त्यहाँ भगवान् रामभद्रको दर्शनका साथै पार्टीका पदाधिकारीहरूसँग छलफलसमेत गर्नेछन् । यसबाहेक उनी महन्त नृत्य गोपालदासको जन्मोत्सव कार्यक्रममा समेत सहभागी हुनेछन् ।
अयोध्यामा योगी रामजन्मभूमि र हनुमान्गढीसमेत पुग्नेछन्, जसको राजनीतिक निहितार्थ निकाल्न खोजिँदैछ ।
योगीको यात्राको एक दिनअघि मात्रै अयोध्यामा बाबरी मस्जिद भत्काएको आरोपमा सीबीआईको अदालतले भाजपाका कतिपय वरिष्ठ नेताहरूसहित १२ व्यक्तिहरूविरुद्ध आपराधिक षड्यन्त्रको मुद्दा चलाउने स्वीकृति दिएको थियो ।
मंगलबार सीबीआईको अदालतमा हाजिर हुन आएका भाजपाका वरिष्ठ नेताहरू लालकृष्ण आडवाणी र मुरली मनोहर जोशीले लखनऊमा योगीसँग भेटेका थिए ।
मुद्दाको सुनुवाइको तारिख पहिले नै निर्धारित थियो तर योगीको अयोध्या जाने कार्यक्रम पछि तय भयो । यो सन्दर्भलाई लिएर विभिन्न अड्कलबाजीहरू गरिएका छन् ।
वरिष्ठ पत्रकार योगेश मिश्र भन्छन्, ‘‘चाहे संयोग होस् वा जानी–बुझीकन बनाइएको कार्यक्रम होस्, योगीको यो यात्रामार्फत भाजपाले के सन्देश दिन चाहन्छ भने राममन्दिरको मुद्दा उसले छोडेको छैन र ऊ आफ्नो एजेन्डामा अटल छ ।’’
बीबीसीका अनुसार मंगलबार लखनऊमा सीबीआईको अदालतमा हाजिर हुन आएका पूर्वसांसद रामविलास वेदान्ती, विनय कटियार र उमा भारती आदि नेताहरूको कुराकानी सुन्दा योगी आदित्यनाथको अयोध्यायात्रा कुनै खास उद्देश्यबाट प्रेरित रहेको अड्कल गर्न सकिन्छ । कतिपयले योगी आदित्यनाथले अयोध्याबाटै उपचुनाव लड्न सक्ने अड्कल पनि गरेका छन् ।
योगीले अयोध्याका लागि आफ्नो यात्राभन्दा पहिले नै विकास र पर्यटनसँग सम्बन्धित थुप्रै घोषणाहरू गरिसकेका छन् । तर अरू कुरा भन्दा अहिले सबैको ध्यान योगीले राममन्दिरबारे के भन्छन् भन्ने कुरामै छ । राममन्दिरका बारेमा चुनावअघि योगी स्वयं पनि निकै मुखर बन्ने गरेका थिए ।
तर वरिष्ठ पत्रकार योगेश मिश्रलाई उद्धृत गर्दै बीबीसीमा लेखिएअनुसार, योगीले मन्दिर निर्माणसँग सम्बन्धित कुनै घोषणा गर्ने सम्भावना तत्काल देखिँदैन ।