काठमाडौं । केरलमा आयोजित कथित ‘बीफ फेस्टिबल’ बारे सुरु भएको विवादपछि भारतीय कांग्रेस आफ्नो छविलाई लिएर चिन्तित देखिएको छ । बीबीसीमा प्रकाशित वात्सल्य रायको रिपोर्टका अनुसार कांग्रेसका नेताहरूले समेत यो घटनाले आफ्नो पार्टीको छविलाई प्रभावित पार्न सक्ने आकलन गरेका छन् । कांग्रेस नेता शकील अहमदले बीबीसीसँग भनेका छन्, ‘‘यस्ता घटनाले गलत सन्देश दिन्छन् र पार्टीलाई हानि हुन्छ ।’’
भएको के थियो ?
केही दिन पहिले भारत सरकारले पशुहरूप्रति हुने क्रूरताको निवारण गर्ने अधिनियमको एक धारालाई परिवर्तन गरेको थियो । यसपछि जुन चौपायाहरूलाई बजारबाट खरिद गरिन्छ, तिनलाई मार्न पाइँदैन । यो नियमको दक्षिण भारतमा व्यापक विरोध भैरहेको छ । यसैअन्तर्गत केरलमा युवक कांग्रेसका केही नेताहरूले बीफ फेस्टिबलको आयोजना गरे । यससँग जोडिएको एउटा भिडियो बाहिर आएपछि विवाद सुरु भयो । ‘बीफ फेस्टिबल’ भिडियो बाहिर आउँदाबित्तिकै भाजपा आक्रामक बन्यो र कांग्रेस रक्षात्मक देखिन पुग्यो ।
भिडियोमा केरल कांग्रेसका केही नेताहरूले खुलेयाम गाईको एउटा बाच्छालाई मार्न लागेको देखिन्छ । भारतीय जनता पार्टीका एक जना प्रवक्ताले यसबाट हिन्दूहरूलाई भड्काउने काम भएको बताए । विवाद बढ्न लागेपछि ट्विटरमा कांग्रेस उपाध्यक्ष राहुल गान्धीको प्रतिक्रिया आयो । उनले घटनाको निन्दा गरे र कांग्रेसले भिडियोमा देखिएका नेताहरूको सदस्यता निलम्बित गर्यो । यद्यपि भारतीय जनता पार्टीले यो मुद्दालाई जसरी उठायो, कांग्रेसका नेताहरूले त्यसमाथि प्रश्न उठाइरहेका छन् । भाजपाले यो मुद्दामा समाजलाई विभाजन गर्न खोजेको कांग्रेसको आरोप छ ।
तर विश्लेषकहरूका अनुसार केरल मुद्दाले कांग्रेसलाई निकै अप्ठ्यारो परेको छ । उसले गोहत्याराहरूलाई संरक्षण गरिरहेको छ र उसको मूल मानसिकता हिन्दू संस्कृतिविरोधी छ भन्ने कुरा यो घटनाबाट साबित हुने र यसलाई मेटाउन कांग्रेसलाई निकै गाह्रो पर्ने उनीहरूको धारणा छ ।