काठमाडौं । भाजपाका वरिष्ठ नेता लालकृष्ण आडवाणी, मुरलीमनोहर जोशी र उमा भारती आज मंगलबार सीबीआईको विशेष अदालतमा हाजिर हुने भएका छन् । बाबरी मस्जिद भत्काएको आरोपमा उनीहरूविरुद्ध चलेको मुद्दामा आज उक्त अदालतले फैसला गर्दैछ । अदालतमा हाजिर हुन आडवाणी र जोशी दिल्लीबाट लखनऊतर्फ हिँडिसकेको दैनिक हिन्दूस्तानले जनाएको छ ।

वरिष्ठ भाजपा नेताहरूका अतिरिक्त सीबीआईका विशेष न्यायाधीश एस.के.यादवले भाजपा नेताहरू विनय कटियार, विश्व हिन्दू परिषद्का नेता विष्णुहरि डालमिया र साध्वी ऋतम्भरालाई अदालतमा व्यक्तिगत रूपमा पेस हुन भनेका छन् । अदालतले अब छुट या सुनुवाई स्थगित गर्ने कुनै आवेदन स्वीकार नगरिने बताएको छ । 

सीबीआईको अदालतले अयोध्यामा बाबरी मस्जिदको विवादित संरचना भत्काएको आरोपसँग जोडिएका दुई अलग–अलग मुद्दाको सुनुवाई गरिरहेको छ । महन्त नृत्य गोपाल दास, महन्त राम विलास वेदान्ती, वैकुण्ठलाल शर्मा अर्थात् प्रेमजी, चम्पत राय वंशल, महन्त धर्मदास र सतीश प्रधानलाई यसै मुद्दाका सन्दर्भमा बुधबार अदालत बोलाइएको छ ।