काठमाडौं । पाकिस्तानको सर्वोच्च अदालतमा भारतीय नौसेनाका पूर्वअधिकारी कुलभूषण जाधवलाई छिटै फाँसी दिइनुपर्ने माग गर्दै निवेदन दर्ता गरिएको छ । भारतीय समाचार संस्था पीटीआईका अनुसार निवेदनमा कुलभूषण आफूविरुद्ध सुनाइएको सजाय परिवर्तन गर्न असमर्थ रहेको अवस्थामा उनलाई छिटै फाँसी दिइनुपर्ने माग गरिएको छ । 
पाकिस्तानको सर्वोच्च अदालतमा दर्ता गरिएको सो मुद्दा शनिबार पाकिस्तानी वकिल मुजम्मिल अलीले विपक्षी दल पाकिस्तान पिपुल्स पार्टी र संसद्का पूर्वअध्यक्ष फारुख नायकका तर्फबाट दर्ता गरेका हुन् । निवेदनमा सर्वोच्च अदालतसँग पाकिस्तानको कानुनअनुसार कुलभूषणको हाल स्थगित रहेको मुद्दामाथि छिटो फैसला गर्नका लागि सरकारलाई निर्देशन दिन अनुरोध गरिएको छ । पाकिस्तानको सैन्य अदालतले कुलभूषण जाधवलाई जासूसी र विध्वंसक गतिविधिमा संलग्न भएको आरोपमा फाँसीको सजाय सुनाएको थियो । 
स्मरणीय के छ भने जाधव मुद्दा अहिले अन्तर्राष्ट्रिय न्यायालयमा विचाराधीन छ र न्यायालयले यस मुद्दामा अन्तिम फैसला नआउँदासम्म कुलभूषणलाई फाँसी दिन रोक लगाएको छ ।