काठमाडौं । एनसेल बाह्रखरी गल्फ आइतबार (आज) बाट सुरु हुँदैछ । गल्फका लागि खेलाडी र पाहुनाको टोली लुक्ला पुगेको छ । बाह्रखरी मिडिया प्रालिको वार्षिक इभेन्ट ‘आमन्त्रण गल्फ प्रतियोगिता’को तेस्रो संस्करण अन्तरगत आजबाट सुरु हुनेगल्फ प्रतियोगिताका लागि विभिन्न देशबाट आएका पत्रकार तथा खेलाडीको टोली लुक्ला पुगिसकेको छ । 

लुक्लामा रहेका खेलाडी, पत्रकार तथा पाहुनाको टोली हाइकिङ, योगालगायत कार्यक्रममा सहभागी भएको छ । 

नेपाल भ्रमण वर्ष २०२० को प्रवर्द्धनमा उल्लेखनीय सहयोग पुर्याउने उद्देश्यका साथ प्रतियोगिता आयोजना गरिएको हो ।

प्रतियोगिता आइतबार चार हजार दुई सय ५० मिटर उचाइमा रहेको सगरमाथा क्षेत्रको कोङ्दे री मा खेलाइनेछ, जहाँ ४० बढी कर्पोरेट गल्फरले एक पार–३ कोर्समा प्रतिस्पर्धा गर्नेछन् ।  

“यति ठूलो प्रतियोगिता आयोजना गर्न पाउँदा हामी धेरै उत्साहित छौं,” बाह्रखरी मिडियाका उप–महाप्रबन्धक सूर्य घिमिरेले भने, “आयोजनाका लागि सम्पूर्ण तयारी पूरा भएको छ ।”

उप–महाप्रबन्धक घिमिरेका अनुसार प्रतियोगिता दुई चरणमा हुनेछ । पहिलो चरण कोङ्देमा आइतबार हुनेछ, जसमा ४० बढी गल्फरहरुले एक होल खेल्नेछन् । दोस्रो चरणमा सबै गल्फरले अक्टोबर २६ मा काठमाडौंको गोकर्ण रिसोर्टमा बाँकी रहेका १७ होल खेल्नेछन् । दोस्रो चरणमा अन्य खेलाडी पनि सहभागी हुनेछन् । दुई चरणमा गरी करिब एकसय गल्फरले प्रतिस्पर्धा गर्नेछन् ।