काठमाडौं । भारतको सर्वोच्च अदालतले त्यहाँका अर्बपति गौतम अडानीमाथि दुई महिनाभित्र छानबिन गर्न सेयर बजारको नियमनकारी निकाय (सेबी)लाई आदेश दिएको छ ।

एक महिनाअघि अमेरिकी अनुसन्धान एजेन्सी हिन्डनवर्गले अडानीले आफ्ना कम्पनीको सेयरको मूल्य कृत्रिम रूपमा बढाएको प्रतिवेदन सार्वजनिक गरेको थियो ।

अदालतले अडानी–हिन्डनवर्ग मुद्दाको नियामक संयन्त्रको समीक्षा गर्न एक विशेषज्ञ समिति पनि गठन गरेको छ ।

अमेरिकी वेबसाइट हिन्डनवर्गमा प्रकाशित प्रतिवेदनका आधारमा अडानी समूहविरुद्ध छानबिन गर्न माग गर्दै सर्वोच्चमा रिट दायर गरिएको थियो । भारतीय कांग्रेसका नेता डा. जय ठाकुरले अडानी र उनका सहयोगीले नागरिकको करोडौँ रुपैयाँ रकम ठगी गरेको आरोप लगाउँदै रिट निवेदन दायर गरेका हुन् ।

निवेदकले बहालवाला न्यायाधीशको निगरानीमा सीबीआई, ईडी, डीआरआई, एसईबीआई, आरबीआई, एसएफआईओलगायत अनुसन्धान गर्ने निकायबाट त्यसको छानबिन गर्न माग गरेका थिए ।

अदालतले रिटउपर बिहीबार सुनुवाइ गर्दै अडानीमाथि छानबिन गर्न सेबीलाई निर्देशन दिएको हो ।