काबुल । उत्तरी अफगानिस्तानको एउटा धार्मिक विद्यालय अर्थात मदरसामा भएको एक शक्तिशाली बम बिस्फोटमा कम्तिमा १० जना विद्यार्थी मारिएको सत्तारुढ तालिवान सरकारले जनाएको छ ।
सामान्गान प्रान्तको एवाकस्थित सो विद्यालयमा भएको बम हमलामा अन्य थुप्रै व्यक्ति घाइते भएका आन्तरिक मामिला मन्त्रालयका प्रवक्ताले बीबीसीलाई बताएका छन् ।
तर, मृतकको सङ्ख्या यकिन भइसकेको छैन । दुईजना प्रान्तीय अधिकारीले भने १७ जनाको ज्यान गएको बताएका छन् । अहिलेसम्म यस आक्रमणको कुनै समूहले जिम्मेवारी लिइसकेको छैन ।
मानिसहरु प्रार्थना गरेर निस्किरहेका बेला बिस्फोट भएको बताइएको छ । स्थानीय अस्पतालका एकजना डाक्टरका अनुसार मारिनेहरुमध्ये अधिकांश विद्यार्थी रहेका छन् ।
गृह मन्त्रालयका प्रवक्ता अब्दुल नाफी ताक्कुरले घटनामाथि अनुसन्धान गरिरहेका तालिवान सुरक्षा फौजले आक्रमणकारीहरुलाई पक्राउ गरी सजाय दिने प्रतिबद्धता जनाएको बताएका छन् ।
ऐतिहासिक सहर एवाक प्रमुख व्यापारिक क्षेत्र र चौथो र पाँचौँ शताब्दिमा बौद्धमार्गीहरुको केन्द्रको रुपमा चिनिन्छ । यो सहर राजधानी काबुलदेखि करिब २०० किलोेमिटर उत्तरमा पर्दछ ।
तालिवान सत्तामा पुगेयता अफगानिस्तानमा दर्जनौँ बम आक्रमण भइसकेको छ । अधिकांश आक्रमणको जिम्मा इस्लामिक स्टेट–खोरासान प्रोभिन्स (आईएसआईएस–के) नामक समूहले लिएको छ ।