न्यूयोर्क । ट्विटरले अबदेखि कोभिड १९ सम्बन्धी गलत सूचना नीतिमा प्रतिबन्ध नलगाउने भएको छ ।

ट्विटरका सीईओ एलोन मस्कले गलत सूचना नीतिको कार्यान्वयन कसैलाई थाहा नै नदिइ चुपचाप अन्त्य गरेको अन्तर्राष्ट्रिय समाचार संस्था वानइण्डियाडटकमले जनाएको छ । तर, अझै पनि फैलिरहेको भाइरससँग लड्ने प्रयासहरूमा ट्विटरको उक्त कदमले खोपमा झैँ प्रभाव पार्न सक्ने भन्दै स्वास्थ्य र मिडिया विज्ञहरूमा चिन्ता बढेको छ ।

धेरै ट्विटर प्रयोगकर्ताहरूले ट्विटरको अनलाइन नियमहरूमा एक वाक्य अद्यावधिक गरिएको कुरा औँल्याएका छन् । जसमा ‘२३ नोभेम्बर, २०२२ देखि लागु हुनेगरी ट्विटरले अब कोभिड १९ सम्बन्धी भ्रामक सूचना नीति लागु नगर्ने’ उल्लेख छ । 

यसबारेमा प्रतिक्रिया दिँदै पूर्वआपत्कालीन कक्ष चिकित्सक डा. सिमोन गोल्डले माइक्रो–ब्लगिङ प्लेटफर्म ट्विटरमा लेखेका छन्, “ट्विटरले नोभेम्बर २३ देखि कोभिड १९ सम्बन्धी गलत सूचना नीति लागु गर्न बन्द गरेको छ । यो नीति विश्वभरका ती मानिसहरूलाई मौन राख्न प्रयोग भएको थियो । जसले भाइरस र उपचार विकल्पहरूबारे मिडिया रिपोर्टिङमा प्रश्न उठाएका थिए । अभिव्यक्ति स्वतन्त्रता र चिकित्सा स्वतन्त्रताको जित !”

पीटीआईले रिपोर्ट गरेअनुसार कोभिड १९ को भाइरस अझै पनि फैलिने क्रम जारी छ । 

रिपोर्टअनुसार मस्कले गलत जानकारीविरुद्ध लड्नको लागि प्लेटफर्मको धेरै अघिल्लो नियमहरू उल्टाउन रुचि देखाएका छन् । 

गत हप्ता मस्कले ट्विटरबाट हटाइएका खातावालाहरूलाई ‘माफी’ दिने बताएका थिए । उनले कोभिड १९ को गलत जानकारी फैलाउने धेरै व्यक्तिहरूको खाताहरू पनि पुनः ब्युँताएका छन् । जसमा रेप. मार्जोरी टेलर ग्रीनको पनि रहेको छ । उनको व्यक्तिगत खाता यस वर्ष ट्विटरको कोभिड १९ का नियमहरू बारम्बार उल्लंघन गरेको कारण निलम्बनमा परेको थियो । वानइण्डियाडटकमबाट