न्यूयोर्क । विश्व स्वास्थ्य संगठन (डब्ल्यूएचओ)ले अबदेखि मन्कीपक्सलाई ‘एमपक्स’को रूपमा चिनाइने घोषणा गरेको छ ।

भाइरसको नामसँग जोडिएको नस्लवादी र कलंकित भाषाको बारेमा गुनासोहरू प्राप्त हुन थालेपछि डब्ल्यूएचओले यो कदम उठाएको हो । तर, पुरानो नाम पूर्णरूपमा मेटाइनुअघि एक वर्षसम्म पुरानो नाम ‘मन्कीपक्स’ नयाँ नामसँगै प्रयोग गर्न सकिने पनि बताइएको छ ।

सम्बन्धित विशेषज्ञ, मुलुक र आम मानिसहरूबीच भएको लामो छलफल पछि ‘एमपक्स’को बारे निर्णय भएको हो । डब्लयूएचओले यो नयाँ नामलाई अंग्रेजीलगायत अन्य भाषामा सजिलैसँग प्रयोग गर्न सकिने जनाएको छ । 

मानव मन्कीपक्स पहिलोपटक सन् १९७० मा पहिचान भएको हो । एक दशकभन्दा लामो समयअघि पक्रिएका बाँदरहरूमा भेटिएका भाइरसका कारण यो रोग देखिएकाले यसलाई ‘मन्कीपक्स’ भनिएको हो । 

वास्तवमा त्यतिबेला देखि नै डब्ल्यूएचओले रोगहरूलाई नामकरण गर्न सल्लाह माग्दै आएको हो । साथै, डब्ल्यूएचओले कुनै पनि रोगको नाम राख्दा त्यसले व्यापार, यात्रा, पर्यटन वा जनावरको कल्याण देखि कुनै पनि सांस्कृतिक, सामाजिक, राष्ट्रिय वा जातीय समूहलाई नकारात्मक असर नपर्नेतर्फ ध्यान दिइनु पर्ने जनाएको छ । जसको कारण कोभिड महामारीका बेला भेरियन्टहरूका नामले कसैलाई अनावश्यक रूपमा असर नपर्ने गरी ग्रीक अक्षरहरूबाट राखिएको थियो । 

यो वर्ष विश्वका धेरै मुलुकमा अस्वाभाविक रूपमा मन्कीपक्स फैलिएको छ । क्यानडा, अमेरिका र अस्ट्रेलियालगायत युरोपका २९ मुलुकमा मन्कीपक्स देखिएको हो । बीबीसीबाट