बेइजिङ । कोभिडको कारण सरकारले लागु गरेको लकडाउनविरुद्ध चीनभर फैलिरहेको प्रदर्शनकाे समाचार संकलन गरिरहेका बीबीसीका एक पत्रकारलाई सांघाइमा चिनियाँ प्रहरीले कुटपिट गर्नुका साथै केही समय हिरासतमा लिएको छ ।

पत्रकार एड लरेन्सलाई आइतबार मुख्य प्रदर्शन थलोमा हिरासतमा लिएर प्रहरीले केही घण्टा थुनेकाे थियाे । बीबीसीले आफ्नो कर्तव्य निभाइरहेका एक पत्रकारलाई आक्रमण गरिएकोमा गहिरो चिन्ता प्रकट गरेको छ । 

तर, चीन सरकारले भने लरेन्सले आफ्नो प्रेस परिचय पत्र नदेखाएको जनाएको छ । उनलाई सबैभन्दा ठूला विरोध प्रदर्शन आयोजना भइरहेको सांघाइको उलुमुक्वी मिडल रोडमा फिल्म खिचिरहेको अवस्थामा प्रहरीले नियन्त्रणमा लिएको थियो ।

थुप्रै प्रहरीले लरेन्सलाई समाएर भुँइमा लडाइरहेको भिडियो फुटेज अहिले चीनको सामाजिक सञ्जालमा भाइरल भइरहेको छ । 

बीबीसीले यसरी पत्रकारमाथि दुर्व्यवहार हुनु खेदजनक रहेको र अहिलेसम्म चीनले यस सम्बन्धमा औपचारिक क्षमा नमागेको पनि जनाएको छ । बीबीसीका अनुसार लरेन्सलाई कुटपिट गर्दै हतकडी लगाएर लगिएको थियो ।