सिडनी । अस्ट्रेलियाको सिड्नीस्थित एउटा प्राथमिक विद्यालयको कक्षा कोठामा भइरहेको विज्ञान विषयको प्रयोगमा त्रुटि भएपछि थुप्रै विद्यार्थी घाइते भएका छन् ।
स्थानीय सञ्चार माध्यमका अनुसार शरीर नराम्ररी पोलेर गम्भीर घाइते भएका कम्तीमा दुईजना विद्यार्थीलाई एम्बुलेसन्समा हालेर अस्पताल पुर्याइएका छन् । अन्य नौजनालाई सामान्य चोट लागेको बताइएको छ ।
आउटलेट ९न्युजका अनुसार उनीहरू सोडियम बाइकार्बोनेट र मिथाइलेटिड स्प्रिटसहितको प्रयोग कार्यमा जुटिरहेका थिए । दुर्घटनालगत्तै घटनास्थलमा हेलिकोप्टरहरू, स्वास्थ्यासेवाकर्मी र अग्नि नियन्त्रकहरू पुगेका थिए ।
स्थानीय समय अनुसार सोमबार अपराह्न करिब १ बजे म्यान्ली वेस्ट पब्लिक स्कुलमा यो घटना भएका हो । न्यु साउथ वेल्स एम्बुलेन्सका निमित्त सुपरीवेक्षक फिल टेम्पलमेनले प्रयोग कार्यको क्रममा हावाको कारण प्रयोग भइरहेका केही रासायनिक पदार्थ उडेको बताएका छन् ।
पीडित बालबालिकाहरू १० देखि ११ वर्ष उमेरका छन् । उनीहरूको अनुहार, छाती, तल्लो पेट र खुट्टाहरू जलेका छन् । यस दुर्घटनामा एक जना शिक्षक पनि सामान्य घाइते भएका छन् ।
अनलाइनमा पनि भेटिने 'कार्बन सुगर स्नेक' नामक एक लोकप्रिय विद्यालय विज्ञान प्रयोगमा मिथाइलेटिड स्प्रिट र बेकिङ सोडा अर्थात् सोडियम बाइकार्बोनेटको प्रयोग हुने गर्दछ ।