काठमाडौं । हामीले स्क्रिप्ट लेख्दा नै हरिवंश दाइलाई देखाएका थियौं । उहाँले राम्रो छ, ढुक्क भएर काम गर्दा हुन्छ भन्नुभएको थियो । ‘यत्तिको सिनेमा आँखा चिम्लिएर बनाउँदा हुन्छ, चल्छ’ भन्नुभएको थियो । उहाँले हामीलाई ‘मेरो आशीर्वाद छ’ भन्नु भएको थियो । हरिवंश दाइ र मदनकृष्ण दाइलाई जस्तोतस्तो कामलाई आशीर्वाद दिनु पनि हुँन्न । उहाँहरुको इमेजको पनि कुरा आउँछ । उहाँहरुले राम्रो छ भनेर पछि हेर्दा राम्रो भएन भने उहाँहरुको इमेजसँग जोडिन्छ । त्यसैले म ढुक्क छु ‘जात्रा’ चल्छ भन्नेमा । हुन त अरुले के भन्छ भन्ने भन्दा पनि काम कस्तो छ भन्ने कुराले अर्थ राख्छ । काम पनि राम्रो गरेका छौं । फेरि हरिवंश दाइले आफ्नो इमेजको ख्याल गरेर पनि राम्रो भन्नुभएको हो भनेर पनि हामी आशावादी छौं, ‘जात्रा’ चल्छ भन्नेमा । 

उहाँलाई प्रिमियरभन्दा अगाडि नै सिनेमा देखाउने योजना बनाएका छौं । उहाँले पनि ‘जात्रा’ एकपटक हेर्छु भन्नुभएको छ । उहाँहरु भाइटीकाको भोलिपल्ट अमेरिका जाँदै हुनुहुन्छ । त्यो भन्दा अगाडि नै सिनेमा देखाउँछौं ।  

‘लुट’ र त्यसको सिक्वेलका निर्देशक निश्चल बस्नेतले त ‘जात्रा’ हेरिसक्नु भएको छ । उहाँले राम्रो छ भनेर सामाजिक सञ्जालमा पोष्ट पनि गर्नु भएको थियो । यस अर्थमा पनि सिनेमा राम्रो बनेको छ भन्नेमा हामी विश्वस्त छौं । आशा छ, दर्शकले मन पराइदिनु हुनेछ । 

महजोडीको सिनेमा पनि मैले निर्देशन गर्दैछु । स्क्रिप्ट करिब करिब तयार भइसकेको छ । अहिले म ‘जात्रा’ रिलिजको पूर्वतयारीमा रहेकाले त्यसमा समय दिन सकेको छैन । ‘जात्रा’ रिलिज भएपछि म त्यो सिनेमाको कामलाई अगाडि बढाउँछु । उहाँको सिनेमामा कथा हरिवंश दाइकै छ । यसमा भारी कमेडी भने हुने छैन । सस्तो विषय नउठाएर कमेडीका माध्यमबाट गम्भीर सामाजिक सन्देश दिने खालको हुनेछ  । 

सिनेमामा मह जोडीसँगै अहिलेका चर्चित कलाकार पनि रहनेछन् । कतिसँग अफिसियल कुरा हुन बाँकी रहेकाले नाम सार्वजनिक नगरिए पनि अहिले मन पराइएका र कथालाई न्याय गर्नसक्ने कलाकारलाई नै सिनेमामा लिने मनस्थिति बनाएको छु । 

लोकेसन काठमाडौं हुने सिनेमाको काम भने हामीमै निर्भर रहनेछ । बजेट र अन्य कुनै पनि कुराले नरोकिने भएकाले सिनेमा चाँडै फ्लोरमा जानेछ । सिनेमा ०७४ मै हेर्न पाइनेछ ।

(चलचित्र ‘जात्रा’ का निर्देशक प्रदीप भट्टराई सँगको कुराकानीमा आधारित )