काठमाडौं । राष्ट्रिय मानवअधिकार आयोगले ठूला पर्व नजिकिँदै गर्दा मूल्यवृद्धि अनपेक्षित रूपमा बढेपछि आम उपभोक्ताको अधिकार सुनिश्चित गर्न सरकारलाई निर्देशन दिएको छ ।
दसैँं, तिहार र छठ पर्व नजिकिँदै जाँदा दैनिक उपभोग्य खाद्यान्न तथा अन्य वस्तुको बिक्रीको अवस्था र उपलब्धता, सार्वजनिक यातायातको व्यवस्थापनलगायत विषयमा अनुगमन गरेपछि आयोगले यस्तो निर्देशन दिएको हो ।
आयोगले शुक्रबार विज्ञप्ति जारी गर्दै आमउपभोक्ताको अधिकार संरक्षणार्थ चाडपर्वको समयमा सर्वसाधारणको आवतजावतलाई सहज, सुलभ, मर्यादित, सुरक्षित र मानव अधिकारमैत्री बनाउन तीनवटै तहका सरकारलाई भनेको छ ।
सवारी साधनमा गर्भवती महिला, वालवालिका, जेष्ठ नागरिक, अपांगता भएका व्यक्ति र विरामीलाई प्राथमिकता दिन आयोगले भनेको छ ।
“आमउपभोक्ताका आधारभूत आवश्यकताका सामग्रीहरूको मूल्य निर्धारण र सहज पहुँचका लागि जिम्मेवार निकायबाट हुने अनुगमनलाई थप प्रभावकारी बनाउन आयोग तीनै तहका सरकार स्थानीय प्रशासन, सुरक्षा निकायलगायत सम्बद्ध सबै पक्षलाई आग्रह गर्दछ,” विज्ञप्तिमा भनिएको छ ।
खाद्यान्न तथा अन्य वस्तुहरुको बिक्रीको अवस्था र उपलब्धता, सार्वजनिक यातायातको व्यवस्थापनलगायत विषयमा आयोगले अनुगमन गरेको विज्ञप्तिमा उल्लेख छ ।
आयोगले खाद्य व्यवस्था तथा व्यापार कम्पनी लिमिटेड र साल्ट ट्रेडिङ्ग कर्पोरेशन एवम् सो अन्तर्गतका सुपथ मूल्यका पसलहरू, सुपर मार्केट र खुद्रा किराना पसलहरूबाट जानकारी लिएको जनाएको छ ।
काठमाडौं उपत्यकाका बल्खु, कलंकी, नयाँ बसपार्क, गौशाला र कोटेश्वर क्षेत्रमा रहेका यातायात व्यवसायी केन्द्रहरू र सेवाग्राहीहरूसँग पनि आवश्यक जानकारी लिइएको आयोगले बताएको छ ।