काठमाडौं । दक्षिण कुवेतको मंगाफ सहरको कामदार बस्ने एक ६ तले भवनमा आगलागी हुँदा मृत्यु हुनेमध्ये १५ जनाको पहिचान खुलेको छ । मृत्यु हुनेमध्ये १० जना भारतीय र पाँचजना मलेसियन रहेको कुवेतका मिडियाले उल्लेख गरेका छन् । मृत्यु हुने भारतीय अधिंकाश दक्षिणी क्षेत्रका छन् । 

आगलागी भएको भवनमा १९५ जना विदेश कामदार राखिएको थियो । त्यहाँ बस्ने कामदार अधिकांश भारतको केरला, तमिलनाडु र उत्तर भारतका रहेको जनाइएको छ । 

आगलागी भएको भवन एनबीटीसी ग्रुपसँग सम्बन्धित रहेको थियो । यसका मालिक मलेसियाका व्यापारी केकी अब्राहम हुन् ।आगलागी भएको भवनमा नेपाली पनि रहेको आशंका गरिएको छ । घटनामा नेपाली कामदार परे वा नपरेकोबारे बुझ्न कुवेतस्थित नेपाली दूतावासले आफ्ना तीन कर्मचारीलाई घटनास्थलमा पठाएको छ । 

कुवेतका लागि नेपाली राजदूत घनश्याम लम्सालका अनुसार हालसम्म नेपाली कामदार उक्त घटनामा परेको भन्ने सूचना प्राप्त नभएको जनाए ।

गैरआवासीय नेपाली संघ, कुवेतका पूर्वअध्यक्ष सुजन केसीले आगलागी भएको भवनमा नेपाली पनि रहेको भन्ने सूचना आएको जनाए । तर, घटनामा नेपाली कामदार परे वा नपरेको भने हालसम्म केही नखुलेको बताए । 

आगलागीको घटना स्थानीय समयअनुसार बुधबार बिहान ६ बजे भएको थियो । आगलागी नियन्त्रणमा आएपछि कुवेतका उपप्रधानमन्त्री शेख फहाद युसुफ साउद अल–सबाह घटनास्थल पुगेका थिए । उनले नै कम्तीमा ४१ जनाको मृत्यु भएको पुष्टि गरेका थिए ।  उपप्रधानमन्त्री अल–सबाहले घरजग्गा मालिकले नियमको उल्लंघन गरी भवन बनाएको आरोप लगाएका छन् । उनले कम्पनीले नियमविपरीत क्षमताभन्दा बढी कामदार उक्त भवनमा राखेको जनाएका छन् । घटनाको छानबिन गरी दोषीलाई कारबाही गर्ने प्रतिबद्धता उनले जनाएका छन् । 

घटनास्थलमा बुझ्नको लागि कुवेतस्थित नेपाली दूतावासका कन्सुलर सुजनी राना, श्रम सहचारी गिरीप्रसाद आचार्यसहित तीनजनालाई पठाइएको राजदूत लम्सालले बताए ।