बेइजिङ । चीनका राष्ट्रपति सी जिनपिङले चीन र रुसबीचको सम्बन्ध हुरी र वर्षाका बावजुद पनि अघि बढ्ने शक्तिशाली फोर्स भएको जनाएका छन् । 

चीन भ्रमणमा रहेका रुसी राष्ट्रपति भ्लादिमिर पुटिनसँगको भेटवार्तापछि संयुक्त पत्रकार सम्मेलनमा बोल्दै उनले सो कुरा बताएका हुन् । उनले सो अवसरमा इजरायल र गाजा क्षेत्रको समस्याको तत्काल समाधान जरुरी रहेको समेत बताएका छन् ।

पत्रकार सम्मेलनमा सुरुमा सीले बोल्न थालेका थिए भने पुटिनले पछि बोलेका थिए । सो अवसरमा पुटिनले चिनियाँ कार निर्मातालाई रुसमा स्वागत रहेको समेत बताएका थिए । बेइजिङ अहिले रुसका लागि कारको मुख्य आपूर्तिकर्ता हो । यस्तै, कपडा र अन्य उत्पादन पनि चीनबाट नै त्यता जाने गरेको छ । किनकी पश्चिमा मुलुकले अहिले रसियामा नाकाबन्दी लगाइरहेका छन् ।

पुटिनले सो अवसरमा दुई देशबीच गहिरो शान्तिपूर्ण आणविक सहयोगको बारेमा समेत कुराकानी भएको जनाएका छन् । तर, त्यो कस्तो हो भन्ने बारेमा उनले बताएनन् । यस्तै, उर्जा सहयोगलाई व्यापक बनाउने बारेमा पनि ठोस योजना भएको जनाउँदै उर्जा रुसको प्राथमिकताको विषय भएको जनाएका थिए । उनले रुसले अहिले चीनमा खाद्यान्न आपूर्ति बढाएको समेत जनाएका छन् । उनले चीनसँगको रुसी व्यापार अहिले ९० प्रतिशत सम्म भएको जनाएका छन् ।

सीले चीन र रुसको सम्बन्ध आपसी सम्मान र चासोको संगम रहेको जनाएका थिए । सो अवसरमा रुस र युक्रेनबीचको युद्धको राजनीतिक समाधान गर्नुपर्ने विषयमा चीन र रुसबीच सहमति भएको जनाइएको छ । सीले  युरोपमा शान्ति र स्थिरता चाँडो पुनस्र्थापित हुनुपर्ने कुरामा जोड दिएका छन् । सो अवसरमा विभिन्न क्षेत्रीय र अन्तर्राष्ट्रिय विषयमा पनि कुराकानी भएको जनाइएको छ । पुटिनले दुवै देश स्वतन्त्र विदेश नीतिको पक्षमा रहेको जनाएका थिए । विश्वव्यापी संस्थाहरूलाई दुवै देशले राजनीतिबाट मुक्त हुन आग्रह समेत गरेका छन् । उनीहरूले पत्रकारहरूबाट कुनै प्रश्न भने लिएनन् ।