काठमाडौं । अख्तियार दुरुपयोग अनुसन्धान आयागले वाइडबडी खरिदमा भएको 'भ्रष्टाचार' प्रकरणमा एक अर्ब ४७ करोड १० लाख ८५ हजार रुपैयाँ बिगो कायम गर्दै मुद्दा दायर गरेको छ ।

बिहीबार विशेष अदालतमा दायर गरिएको मुद्दामा २४ नेपालीसहित ३२ लाई प्रतिवादी बनाइएको छ । जसमध्ये पाँचवटा विदेशी कम्पनी र ती कम्पनीका प्रतिनिधि छन् । 

प्रतिवादी बनाइएकामा निगमसँग सुरुमा ठेक्का सम्झौता गरेको अमेरिकाको एएआर इन्टरनेसनल र त्यसका अध्यक्ष एवं सीईओ जोन होल्मेस छन् । उनी बेलायती नागरिक हुन् ।

अख्तियारले प्रतिवादी बनाएको अर्को आपूर्तिकर्ता कम्पनी जर्मन एभिएसन क्यापिटल हो । यस कम्पनीका प्रबन्ध निर्देशक आना टोपालाई पनि प्रतिवादी बनाइएको छ ।

पोर्चुगलको हाइफ्लाई ट्रान्सपोर्ट एरोजसहित त्यस कम्पनीका अध्यक्ष पाउलो मिरपुरीलाई पनि भ्रष्टाचार मुद्दाका प्रतिवादी बनाइएको छ ।

आयरल्यान्डको हाइफ्लाई एक्ससहित कम्पनीका निर्देशकद्वय गेराल्ड थ्रोन्टन र क्रिस्टियन न्ह्युलेनलाइउ पनि अख्तियारले प्रतिवादी बनाएर मुद्दा दायर गरेको छ ।

नर्टन रोज फुलब्राइट जर्मनी  र कम्पनीका हेड अफ एभिएसन मार्कुस र्‍याडब्रुच र वरिष्ठ परामर्शदाता राल्फ स्प्रिङ्गरलाई पनि अख्तियारले प्रतिवादी बनाएर मुद्दा दायर गरेको छ । यी कम्पनीहरू प्रत्येकलाई अख्तियारले एक अर्ब ४७ करोड १० लाख ८५ हजार ४८२ रुपैयाँ असुलउपर गर्नुपर्ने मागदाबी लिएको छ ।

नेपाल सरकारका मन्त्री, सचिव, नेपाल वायुसेवा निगमका महाप्रबन्धक, सञ्चालक समितिका सदस्यहरू र कर्मचारीलाई बिगोबमोजिम जरिवानासमेतको माग भएकोमा यी कम्पनीबाट भने बिगो असुलको मात्र मागदाबी गरिएको हो ।