काठमाडौं । चालु आर्थिक वर्ष २०८०/०८१ को फागुन मसान्तसम्म निजी क्षेत्रमा कर्जा प्रवाह करिब दुई खर्बले बढेको छ ।

राष्ट्र बैंकका अनुसार बैंक तथा वित्तीय संस्थाबाट निजी क्षेत्रमा प्रवाह भएको कर्जा एक खर्ब ९९ अर्ब ५० करोड (४.२ प्रतिशत)ले बढेको हो ।

गत आर्थिक वर्षको यसै अवधिमा यो कर्जा प्रवाह करिब एक खर्ब २८ अर्ब १८ करोड (२.८ प्रतिशत)ले बढेको थियो ।

वार्षिक विन्दुगत आधारमा २०८० फागुन मसान्तमा बैंक तथा वित्तीय संस्थाबाट निजी क्षेत्रतर्फ प्रवाहित कर्जा ५.२ प्रतिशतले बढेको छ ।

जसमा गैरवित्तीय संस्थागत क्षेत्रतर्फ प्रवाह भएको कर्जाको अंश ६३.२ प्रतिशत र व्यक्तिगत तथा घरपरिवार क्षेत्रतर्फ प्रवाह भएको कर्जाको अंश ३६.८ प्रतिशत रहेको छ ।

निजी क्षेत्रतर्फ प्रवाहित कर्जामध्ये वाणिज्य बैंकहरूको कर्जा प्रवाह ४.२ प्रतिशतले, विकास बैंकहरूको ३.५ प्रतिशतले र वित्त कम्पनीहरूको कर्जा प्रवाह ३.९ प्रतिशतले बढेको छ ।

२०८० फागुन मसान्तमा बैंक तथा वित्तीय संस्थाहरूको लगानीमा रहिरहेको कर्जामध्ये ११.७ प्रतिशत कर्जाका लागि चालु सम्पत्ति (कृषि तथा गैरकृषिजन्य वस्तु) सुरक्षणको रूपमा रहेको छ भने ६७.५ प्रतिशत कर्जाका लागि घर जग्गा धितो सुरक्षण रहेको छ ।

कर्जा २४.६ प्रतिशतले, ट्रस्ट रिसिट (आयात) कर्जा ११.५ प्रतिशतले, रियल स्टेट कर्जा (व्यक्तिगत आवासीय घर कर्जासमेत) ५.९ प्रतिशतले र मार्जिन प्रकृतिको कर्जा १२.३ प्रतिशतले बढेको छ भने अधिविकर्ष कर्जा ४३.० प्रतिशतले (पछिल्लो वर्षको कर्जाको पुनरवर्गीकरणको कारणसमेत) र हायर पर्चेज कर्जा २०.७ प्रतिशतले घटेको छ ।