काठमाडौं । ‘कमेडी विथ च्याम्पियन’को समूहले नयाँ टेलिभिजन शोजको तयारी गरेको छ । केही महिना पछि  प्रसारण गर्नेगरी शोजको तयारी भइरहेको निर्माण पक्षले जनाएको छ । 

‘कमेडी नाइटस् विथ च्याम्पियन’ र चलचित्र ‘महाजात्रा’को टिमले फागुन अन्तिममा संयुक्त रूपमा नेपाल टुर गरेर शोजको अफिसियल घोषणा गर्ने निर्माण पक्षले तयारी गरेको छ । 

विशाल भण्डारीले निर्देशन गर्ने शोजको नाम ‘कमेडी नाइटस् विथ च्याम्पियन’ राखिनेछ । शोजमा अधिकांश कलाकार ‘कमेडी विथ च्याम्पियन’कै रहनेछन् ।  

हालसम्म दीपाश्री निरौला, सुमन कोइराला, सुमन कार्की, सन्तोष थापा, सजन श्रेष्ठ, सुमन कार्की, पवन भट्टराई, कैलाश कार्की, मेक्सम गौंडेललगायत रहनेछन् । प्रभात लामा पनि थपिने निर्माण पक्षले जनाएको छ । निर्माण पक्षले दीपाश्री निरौलालागयत सबै कलाकारसँग शोजका लागि सम्झौता गरिसकेको छ ।  

क्रिएसन र फर्म्याट पनि नयाँ हुने बताइएको छ । “यो पटक हामी आफ्नै लगानीमा शोज तयार पार्दै छौँ, त्यसैले सेट, प्रोडक्सनदेखि समग्र शोज नै ग्रान्ड हुनेछ,” निर्माण पक्षले बाह्रखरीसँग भन्यो, “विदेशमा जुन खालका भब्य टेलिभिजन शोज हामीले देखिरहेका छौँ, त्यस्तै ठूलो शोज हुनेछ । हामीले यसअघि गरेका शोजभन्दा यो दुई/तीन गुणा ठूलो र भव्य हुनेछ ।”