काठमाडौं । निर्देशक दीपक श्रेष्ठले नेपाली चलचित्र उद्योगमा बलेको आगो ताप्ने प्रवृत्ति रहेको बताएका छन् । पहिलादेखि नै यो प्रवृत्ति रहेको तर अहिले थप मौलाएको उनको भनाइ छ । 

नयाँ कलाकार लिएर सिनेमा बनाउँदा धेरैले आफूलाई सहयोग नगरेको उनको गुनासो छ । “बलेको आगो ताप्ने भन्ने उखान नै छ, यो अहिले थप चरितार्थ भएको पाएँ,” उनले भने । 

नयाँ कलाकार लिएर सिनेमा ‘पर्खी बसेँ तिमीलाई’ बनाउँदा आफूले निकै चुनौती भोग्नु परेको दीपक बताउँछन् । नयाँ कलाकार लिएकै कारण पोस्टर टाँस्न समेत समस्या भएको उनको भनाइ छ । नयाँ अनुहारलाई लिएर सिनेमा बनाउँदा बाटोमा काँडैकाँडा मात्रै भेटिने उनको अनुभव छ । 

“नयाँ कलाकार लिएर बनाएको सिनेमा कसले हेर्ने भनेर भनिरहेको मैले पाएको छु । प्रिमियरमा मेरो सिनेमा हेर्न आउनुस्, नराम्रो छ भने नराम्रो भन्नुस्,” निर्देशक दीपक भन्छन्, “मेरो यो २७औँ सिनेमा हो । राम्रो चलचित्र बनाउने भए सातवटा चलचित्र पनि बन्दैन थिए होला ।” 

आफ्नो सिनेमा कस्तो छ भनेर आफूबाहेक कसैलाई थाहा नभएको उनको दाबी छ । “प्रदर्शन नभइ मेरो सिनेमा राम्रो छैन भनेर कसरी थाहा भयो ? मबाहेक मेरो परिवारलाई पनि मेरो सिनेमा कस्तो छ भन्ने थाहा छैन,” उनले भने । 

नयाँ अनुहारलाई लिएर कथा भन्दा जीवन्त हुने भएकाले आफूले नयाँ कलाकार लिएको उनको भनाइ छ । 

‘पर्खी बसेँ तिमीलाई’का नायक किरण श्रेष्ठ सुरुमा सबै कलाकार नयाँ नै हुने बताउँछन् । “नयाँलाई साथ दिनुपर्छ । नयाँलाई सबैले साथ दिनुपर्छ,” उनले भने, “नयाँ भएकै कारण पाउनेजति स्पेस नपाएको जस्तो लाग्छ ।” 

यद्यपि, सिनेमा हेर्दा दर्शकले नयाँ कलाकारजस्तो नलाग्ने उनको दाबी छ । आफूले नेटफ्ल्किसको सिनेमामा पनि काम गरिसकेको तर रिलिज हुन बाँकी रहेको उनले जानकारी दिए । 

नायिका रक्षा बुढाथोकीले अग्रज तथा अनुभवी निर्देशक श्रेष्ठले आफूहरूमा सम्भावना देखेरै लिएको बताइन् । “काम गर्न सक्छन् भनेर नै हामी नयाँ भए पनि दीपक श्रेष्ठले लिनुभएको हो,” उनले भनिन् ।

निर्माता राजाराम बुढाथोकीको लगानी रहेको चलचित्र ‘पर्खी बसेँ तिमीलाई’ यही पुस २७ गते रिलिज हुँदै छ ।