काठमाडौं । नेपाली कथानक चलचित्र ‘चिसो मान्छे’ नेपाली ओटीटी प्लेटफर्म ‘भिडियोपसल’मा रिलिज भएको छ । चलचित्र ‘चिसो मान्छे’ नेपाल बाहिरबाट मात्र हेर्न सकिन्छ । 

कोरोनाको समयमा रिलिज भएकाले ‘चिसो मान्छे’ विदेशमा बस्ने धेरै दर्शक माझ नपुगेकाले ‘भिडियोपसल’ मार्फत विदेशमा हेर्न सकिने व्यवस्था मिलाइएको बताइएको छ । 

स्मार्ट डिभाइसमा भिडियोपसल एप डाउनलोड गरी चलचित्र हेर्न सकिन्छ । भिडियो पसलमा २.९९ डलरदेखि ५.९९ डलरसम्म विभिन्न प्याकेजमा चलचित्र हेर्न सकिन्छ । 

उपलब्ध चलचित्रहरू विदेशबाट एप्पल पे, गुगल पे, पेपल, डेबिट–क्रेडिट कार्डबाट पैसा तिरेर हेर्न सकिनेछ । 

दीपेन्द्र के खनाल निर्देशित ‘चिसो मान्छे’मा अर्पण थापा, स्वस्तिमा खड्का , देशभक्त खनाल, आशान्त शर्मा, प्रभाकर न्यौपाने, रामबाबु रेग्मीलगायत कलाकारको अभिनय छ  ।

चलचित्रलाई शर्मिला पाण्डेले निर्माण गरेकी हुन् । कर्णाली क्षेत्रको कथा भन्ने सिनेमाले मानिसमा देखिएको नैरश्यताको कथा प्रस्तुत गर्छ ।