काठमाडौं । फ्रान्सको मोन्ट सेन्ट मिशेल एबे (एक प्रकारको मठ)को निमार्णका लागि पहिलो ढुङ्गा राखिएको एक हजार वर्ष नाघेको छ । युनेस्को विश्व सम्पदा सूची र प्रमुख नर्मन्डी पर्यटन क्षेत्रमा नोभेम्बरसम्म प्रदर्शनी, नृत्य कार्यक्रम र कन्सर्ट मनाइँदै छ । फ्रान्सेली राष्ट्रपतिले एबेको भ्रमण समेत गरेका छन् ।

राष्ट्रपति इम्यानुएल म्याक्रोनले सोमबार त्यहाँ पुगेर भाषण गरेका छन् । जसमा उनले फ्रान्सेलीहरूलाई जलवायु परिवर्तन जस्ता विश्वव्यापी र अस्तित्वका चुनौतीहरूमा अगाडि बढ्न आह्वान गरेका छन् ।

उनले अबेसँग फ्रान्सेली नागरिकको लचकता र प्रतिरोधको भावनालाई तुलना गरेका छन् । उनले पेन्सनको समयावधि बढाएको विरोधमा प्रदर्शन आयोजना गरिएको एक दिनअघि त्यहाँको भ्रमण गरेका हुन् ।

सन् १९८३ मा तत्कालीन राष्ट्रपति फ्रान्कोइस मिटर्रान्डले यहाँबाटै राजनीतिक सन्देश दिएका थिए भने सन् २००७ मा पूर्वराष्ट्रपति निकोलस सार्कोजीले यहाँबाटै आफ्नो राष्ट्रपतीय अभियान सुरु गरेका थिए ।

फ्रान्सले विगत १५ वर्षमा मोन्ट सेन्ट मिशेलका भवन पुनर्निमार्ण गर्न करिब तीन करोड ४० लाख अमेरिकी डलरभन्दा बढी खर्च गरेको छ । पेरिसबाहिर सबैभन्दा लोकप्रिय फ्रान्सेली गन्तव्य मध्येको एक मोन्ट सेन्ट मिशेल टापुमा गत वर्ष २८ लाख पर्यटक पुगेका थिए ।

यो एबेको स्थापना आठौँ शताब्दीमा अव्रान्चेसका विशप सेन्ट औबर्टले गरेका थिए । यो एबे सेल्ट्स र भाइकिंग्सले नै पवित्र स्थल मानेको ठाउँमा बनाइएको हो ।

शताब्दीयौँदेखि महत्त्व बढ्दै गएको मोन्ट सेन्ट मिशेल १२औँ शताब्दीमा इसाईहरुको सबैभन्दा महत्त्वपूर्ण तीर्थस्थलहरूमध्ये एक थियो । गोथिक शैलीमा बनाइएको एबे मध्ययुगीन वास्तुकलाको उत्कृष्ट कृतिका रुपमा समेत हेरिन्छ ।