काठमाडौं । इरानले ध्वनिभन्दा १५ गुणा तीव्र गतिमा जान सक्ने हाइपरसोनिक मिसाइल बनाएको दाबी गरेको छ । तेहरानको आणविक कार्यक्रमलाई लिएर अमेरिकासँग तनाव बढ्दै गएका बेला इरानले यस्तो घोषणा गरेको हो ।

इरानको सरकारी टेलिभिजनले फत्ताह अथवा फारसी भाषामा विजेता नाम दिएको यो मिसाइलको दायरा एक हजार ४०० किलोमिटर भएको बताएको छ ।

यस्तै यो मिसाइल कुनै पनि क्षेत्रीय मिसाइल प्रतिरक्षा प्रणालीबाट जोगिँदै पार हुनसक्ने समेत दाबी गरिएको छ । दाबीलाई समर्थन गर्ने कुनै प्रमाण भने सार्वजनिक गरिएको छैन ।

इरानको कट्टरपन्थी अर्धसैनिक संगठन रिभोलुसनरी गार्डले राष्ट्रपति इब्राहिम रायसीको उपस्थितिमा मिसाइल सार्वजनिक गरेको बताइएको छ ।

रिभोलुसनरी गार्डसँग यसअघि नै पनि ब्यालिस्टिक मिसाइलहरू रहेका छन् ।

गत नोभेम्बरमा रिभोलुसनरी गार्ड्सका जनरल अमिर अली हाजिजादेहले इरानले हाइपरसोनिक मिसाइल बनाएको दाबी गरेका थिए । तर, त्यतिबेला पनि उनले कुनै प्रमाण भने सार्वजनिक गरेका थिएनन् ।

हाइपरसोनिक हतियारहरू ध्वनीको गतिभन्दा पाँच गुणा बढी तीव्र गतिमा जान सक्छन् ।  ध्वनिको गति प्रतिसेकेण्ड ३४३ मिटर हुन्छ ।
यिनीहरूको उच्च गति र सटिक दिशापरिवर्तन गर्नसक्ने क्षमता क्षेप्यास्त्र प्रतिरक्षा प्रणालीका लागि चुनौती बन्छ । रुस, चीन र अमेरिकाले विभिन्न क्षमताका हाइपरसोनिक क्षेप्यास्त्रको विकास गरिरहेका छन् ।