काठमाडौं । गोकर्णेश्वर नगरपालिकाले आयोजना गरेको राष्ट्रिय प्रतियोगितात्मक गजल महोत्सवमा दैलेखका गजलकार दीपिन सिजापति प्रथम भएका छन् । 

शनिबार काठमाडौंको आरुबारीमा आयोजित प्रतियोगितामा लमजुङकी गजलकारहरू मुना बोहरा दोस्रो र लमजुङकै प्रज्वल अधिकारी तेस्रो भए । 

प्रतियोगितामा भिजन गुरागाई, जगतबहादुर खड्का, लक्ष्मण ढकाल, संयोग बस्याल र प्रकाश समीरले सान्त्वना पुरस्कार प्राप्त गरे । पुरस्कृत गजलकारहरूलाई प्रमुख अथितिलगायतले नगद राशिसहित प्रमाण प्रदान गरे । 

नगरपालिकाले प्रथम, द्वितीय र तृतीय हुने गजलकारलाई क्रमशः नगद ६० हजार, ४० हजार र ३० हजार रुपैयाँ तथा सान्त्वना हुने पाँच जनालाई जनही २० हजार रुपैयाँ प्रदान गरेको थियो ।  

कार्यक्रमलाई सम्बोधन गर्दै गोकर्णेश्वर नगरपालिकाका प्रमुख दीपककुमार रिसाललले यस नगरपालिकालाई साहित्यिक हब बनाउने उद्देश्यका साथ विगत तीन वर्षदेखि साहित्यका विविध प्रतियोगिताहरू आयोजना गर्दै आइरहेको बताए । 

कार्यक्रममा गजलकार ज्ञानुवाकर पौडेल, पूर्वमन्त्री रामेश्वर फुयाँल, साहित्यकार विजय चालिसे, गोविन्द्रप्रसाद घिमिरे वेदमणिले बोलेका थिए ।

प्रतियोगिताका लागि देश विदेशबाट गरी ४५६ वटा गजल प्राप्त भएकोमा प्रारम्भिक मूल्यांकनबाट ४१ वटा गजललाई प्रतियोगिताका लागि चयन गरिएको जानकारी नगरपालिकाले जानकारी दिएको छ ।  

प्रतियोगिताका मूल्यांकनकर्तामा गजलकारहरू करुण थापा, प्रभाती किरण र घनेन्द्र ओझा रहेका थिए ।