काठमाडौं । रोबर्ट लेवानडोवस्कीको दुई गोलप्रेरित बार्सिलोनाले शनिबार राति स्पेनिस ला लिगामा इल्चेलाई ४–० ले पराजित गरेको छ । जितसँगै बार्सिलोनाले शीर्ष स्थानमा १५ अंकको अग्रता लिएको छ ।
पाहुना टोली बार्सिलोनाले २०औँ मिनेटमा लेवानडोवस्कीको गोलबाट अग्रता लिएको थियो । ५६औँ मिनेटमा अंसु फातिले बार्सिलोनाको अग्रता दोब्बर बनाए । त्यसको १० मिनेट बित्न नपाउँदै लेवानडोवस्कीले व्यक्तिगत दोस्रो गोल थपे । ७०औँ मिनेटमा लेवानडोवस्कीकै पासमा फेरान टोरेसले अर्को गोल थपेपछि बार्सिलोनाले सहज जित दर्ता गर्यो ।
जितपछि बार्सिलोनाले २७ खेलबाट ७१ अंक जोडेको छ । दोस्रो स्थानको रियाल मड्रिडको ५६ अंक छ । रियालले एक खेल कम खेलेको छ । साविक विजेता रियालले आज रियाल भालाडोलिडविरुद्ध खेल्नेछ । बार्सिलोना सन् २०१९ पछि पहिलोपटक उपाधिनजिक पुगेको छ ।
ला लिगाका अरू खेलमा गए राति सेभिया काडिजलाई २–० ले हराउँदै १३औँ स्थानमा उक्लिएको छ । काडिज १६औँ स्थानमा झरेको छ ।
१४औँ स्थानको गेटाफेले सातौँ स्थानको एथलेटिक बिल्बाओसँग गोलरहित बराबरी खेल्यो ।
नवौँ स्थानको ओसासुनाले १२औँ स्थानको मायोर्काकाविरुद्ध गोलरहित बराबरी खेल्दा जिरोनाले स्पानियोलाई २–१ ले हरायो ।