काठमाडौं । जनमत पार्टीका अध्यक्ष डा. चन्द्रकान्त राउत (सीके राउत)ले आफ्नो पार्टीले प्रधानमन्त्री पुष्पकमल दाहाल प्रचण्डलाई विश्वासको मत दिने बताएका छन् । सोमबार प्रतिनिधिसभाको बैठकमा बोल्दै उनले विश्वासको मत दिने बताए ।
नेपालमा संघीयता नौलो कुरा नरहेको पनि राउतले बताए । उनले नेपालमा बाइसे, चौबीसे राज्य भनेको संघीयता नै रहेकाले पछिल्लो समय पुनःस्थापित गर्न प्रधानमन्त्रीले महत्वपूर्ण भूमिका खेलेको बताए । उनले सरकारसँग आफ्ना केही असन्तुष्टि रहे पनि त्यसलाई मध्यनजर गरेर सरकार अघि बढ्ने विश्वास रहेको बताए ।
“संघीयता नेपालको सन्दर्भमा कुनै नौलो कुरा होइन । पहिला पनि बाइसे, चौबीसे राज्यहरु नेपालमा थिए । त्यो भनेको संघीयता नै हो । तर, त्यसलाई पुनःस्थापित गर्न प्रधानमन्त्री दाहालले धेरै नै भूमिका खेल्नुभएको छ । यो कुरालाई नकार्न सकिँदैन,” उनले भने, “त्यसैले हामीले उहाँलाई विश्वासको मत दिने निर्णय गरेको छौँ । केही असन्तुष्टिहरु हामीसँग छन्, तर त्यसलाई समाधान गर्न सकिन्छ । सानो कुरामा विश्वासको मत फिर्ता लिनुपर्छ भन्ने छैन ।”
अध्यक्ष राउतले आफ्नो पार्टीले सरकारसँग राखेका मागहरु आगामी दिनमा समेट्दै लैजानुपर्ने बताए ।