विराटनगर । सत्तासाझेदार दल नेकपा (एमाले)का अध्यक्ष केपी शर्मा ओलीले राजनीतिक चलखेल सुरु भए पनि सरकारै संकटमा पर्छ जस्तो आफूलाई नलागेको बताएका छन् ।

बिहीबार विराटनगर विमानस्थलमा सञ्चारकर्मीसँग अध्यक्ष ओलीले सरकार संकटमा परे असाधारण अस्थिरता सुरु हुने बताए ।

“मुख्य कुरा राज्यका एजेन्डा कार्यान्वयन गर्ने भन्ने कुरा हो । तपाईंहरूले भनेजस्तो मलाई यो सरकार संकटमा पर्छ जस्तो लाग्दैन,” उनले भने, “सरकार अस्थिर भयो भने यो प्रणालीमै अस्थिरता आउन सक्छ ।”

निर्वाचन प्रणालीमा कि शासन प्रणालीमा अस्थिरता भन्ने सञ्चारकर्मीको प्रश्नमा उनले शासन प्रणालीमै अस्थिरता आउन सक्ने बताए ।

“नेपालमा राणाशासन र शाह र पञ्चायतमा दमनका कारण स्थिरता देखिए पनि प्रजातन्त्रपछि स्थिरता कायम हुन सकेन,” ओलीले भने, “अहिले पनि सरकार परिवर्तनका खेलमा लाग्ने हो भने शासन प्रणालीलाई दुर्घटनामा लैजान सक्छ ।”

उनले भर्खरै संसद् र सरकार बनेको भन्दै संविधान संशोधनको कुरा गरिहाल्ने समय नभएको बताए । “संविधान भनेको संशोधन हुन नसक्ने कुरा होइन । तर, भर्खरै चुनाव भएर सरकार बनेको अवस्थामा संविधान संशोधनको चर्चा गरिहाल्ने बेला भएको छैन,” ओलीले भने, “लोकतन्त्रका विरुद्धमा षडयन्त्रहरू एकदमै भद्दा ढंगले भइरहेका छन् ।”