काठमाडौं । नेपाली कांग्रेस चितवन जिल्ला सभापति राजेश्वर खनालले चितवन राजनीति प्रयोगशाला बनेको बताएका छन् ।
मंगलबार राजधानी काठमाडौंमा सञ्चारकर्मीहरूसँग बोल्दै उनले गएको चुनावमा टिकट वितरणमा देखिएको मतभेदले कांग्रेसले प्रत्यक्षतर्फ सिट र समानुपातिकतर्फ मत गुमाएको बताए । साथै, उनले क्षेत्रनम्बर २ मा हुने उपनिर्वाचनमा माटोमा भिजेको उमेदवार उठाउन सकेमात्र कांग्रेसले जित्ने उल्लेख गरे ।
“चितवन कांग्रेसले मात्र उपनिर्वाचनमा कांग्रेस जिताउँछु भनेर दृढ भएर हुँदैन । केन्द्रीय समिति र सिंगो कांग्रेस दृढ भएर लागे चुनाव जित्ने ग्यारेन्टी म लिन्छु,” उनले भने ।
निर्वतमान सांसद रवि लामिछानेप्रति इंगित गर्दै उनले चितवन २ का मतदाताले अब झुट र अनागरिक व्यक्तिलाई पुनः मत दिएर जिताउने विश्वास आफूलाई नरहेको बताए । आसन्न उपनिर्वाचन पार्टीको प्रतिष्ठासँग जोडिएकाले पनि चुनाव जिताउन कांग्रेस सभापति शेरबहादुर देउवादेखि चितवनको साधारण सदस्य पनि लाग्नुपर्ने जोड उनको थियो ।
पार्टीको गढ चितवन भए पनि आफ्नै गल्तीका र कमजोरीका कारण चुनाव हार्नुपरेको धारणा राखे । गएको निर्वाचनमा टिकट वितरणमा पार्टीले गरेको निर्णय गलत भएको र उपनिर्वाचनमा अब त्यो दोहोर्याउन नहुने धारणा उनको थियो । साथै, गठबन्धन भनेर चुनाव लड्ने अनि गठबन्धन गर्ने नाइके भागेपछि मतदातामा अन्योल भएको तर्क उनको थियो ।
“मैले प्रचण्डजीलाई अन्तिम घण्टामा आएर चितवन छाड्ने निर्णय नगर्नुहोला, निर्णय गर्नुहुन्छ भने अहिले नै गर्नुहोला भनेर महिना दिनअघि नै भनेको थिएँ । उहाँ गोर्खा जानुभयो । यसले गठबन्धनमा अझ संशय फैलायो,” उनले भने, “कांग्रेस एक्लै लडेको भए जित्थ्यो । ओझेलमा परेका साथीहरू विद्रोहमा निस्कनुभयो । जगन्नाथजी, खुल्ला ३५ मा केन्द्रीय सदस्य जित्नुभएको दिनेशजीहरुले विद्रोह गरेपछि कांग्रेसको मत बाँढिएको हो । अनि हामीले चुनाव जित्न नसकेका हौं । माओवादीबाट पनि गल्ती भयो ।”
नयाँ आएको पार्टीले स्थायित्व नदिने भन्दै उनले जिल्ला बनाउन पार्टीभित्रको अन्तरकलहलाई मथ्यर बनाउनुपर्नेमा जोड दिए । साथै, चितवनमा कांग्रेसलाई पुनः शक्तिशाली बनाउन पनि बाहिरका मान्छेलाई नभएर स्थानीय नेतालाई टिकट दिनुपर्नेमा उनको जोड थियो ।
“चितवनको राजनीति अलि फरक छ । बाहिरबाट आएर बसेका मानिसहरु धेरै हुनुहुुन्छ,” उनले भने, “जसलाई टिकट दिए पनि चितवनकै स्थानीय नेतालाई टिकट दिन मैले सभापतिलाई आग्रह गरेको छु । अब मान्छे को हुन्छ वा उमेदवार को हुनुपर्छ भनेर चाहिँ म भन्दिनँ ।”