काठमाडौं । नेपाली कांग्रेसका सांसद जितेन्द्रनारायण देवले नेपालका विश्वविद्यालयहरु दलीयकरणको मारमा परेको बताएका छन् । 

राष्ट्रियसभा अन्तर्गतको विधायन व्यवस्थापन समितिको मंगलबार बसेको बैठकमा बोल्दै उनले नेपाली विश्वविद्यालयहरुमा स्वायत्तताको विषय ठूलो बनेको बताए । उनले विश्वविद्यालयहरु दलीयकरणको मारमा पर्दा शैक्षिक गुणस्तरमा सुधार हुन नसकेको बताए । 

विश्वविद्यालयहरु दलीयकरण हुँदा विद्यार्थीहरुले उच्च गुणस्तरको शिक्षा ग्रहण गर्न नसकेको बताउँदै उनले उच्च गुणस्तरीय शिक्षा प्राप्त नहुँदा नेपाली विश्वविद्यालयमा अध्ययनरत विद्यार्थीहरु दक्षिण एसियाली विद्यार्थीहरुसँग पनि प्रतिष्पर्धामा पछि परिरहेको बताए । उनले देशभित्र सरकारबाहेकका क्षेत्रबाट शिक्षा क्षेत्रमा आउने पुँजीलाई प्रोत्साहन गर्नुपर्ने बताए ।

“नेपालमा जति पनि विश्वविद्यालयहरु छन्, त्यहाँ एउटा ठूलो विषय भनेको स्वायत्तताको विषय हो । राजनीतीकरणभन्दा पनि दलीयकरणको मारमा परेका छन् । त्यसले पनि शैक्षिक गुणस्तरमा सुधार आउन सकेको छैन,” उनले भने, “देशभित्र सरकारबाहेकका पुँजी जहाँ जहाँ छन् र बाहिरबाट आउनसक्ने सम्भावना जहाँ छ, त्यसलाई एनलाइसेस गरेर इनिसिएटर्सहरु खडा हुन्छ, पहल गर्छ भने त्यसलाई सरकारले इन्करेज गर्नुपर्छ ।”