महोत्तरी । मधेस प्रदेशमा सडक दुर्घटना र यसबाट हुने मानवीय क्षति बर्सेनि बढ्दो छ । चालु आर्थिक वर्ष २०७९÷८० को अर्धवार्षिक प्रतिवेदनअनुसार ६ महिनामा यो प्रदेशमा २८१ ले सडक दुर्घटनामा ज्यान गुमाएका छन् ।

प्रदेशको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया (बारा)को आव २०७९÷८० को अर्धवार्षिक घटना प्रतिवेदनले यो तथ्याङ्क देखाएको हो ।

गत साउन १ गतेदेखि पुस मसान्तसम्मका ६ महिनामा सडक दुर्घटनाका दुई हजार ८७६ घटना भएका छन् । यी घटनामा चार हजार ३७१  घाइते भएका र २८१ जनाले ज्यान गुमाएका कार्यालयका सूचना अधिकारी तथा प्रहरी नायब उपरीक्षक लक्ष्मीप्रसाद भण्डारीले बताए । बारामा मात्रै सडक दुर्घटनाका घटनामा ६ महिनाभित्र ६४ जनाको मृत्यु भएको छ ।

पर्सामा सो अवधिमा २२ जनाको सडक दुर्घटनामा ज्यान गएको छ । गत साउनदेखि पुस मसान्तभित्र धनुषामा ४१, महोत्तरीमा ३५, सप्तरी र सर्लाहीमा ३३÷३३, रौतहटमा २७ र सिरहामा २६ को ज्यान गएको छ ।

दिनहुँ बढ्दै गएका सवारी साधनको चाप र चालकको लापरवाही नै दुर्घटनाको मुख्य कारण देखिएको ट्राफिक प्रहरीको अनुभव छ । मानवीय क्षतिका घटना मोटरसाइकल दुर्घटनामा बढी भएका छन् । तीव्र गतिमा मोटरसाइकल हुइँक्याउने हुँदा यो साधनको दुर्घटनामा बढी मानवीय क्षति हुने गरेको ट्राफिक प्रहरीको भनाइ छ ।

प्रदेशभित्र आव २०७६÷७७ मा एक हजार ३४०, २०७७÷७८ मा तीन हजार ९८३ र  २०७८÷७९ मा पाँच हजार ७११ सडक दुर्घटनाका घटना भए । ती घटनामा क्रमशः ४०९, ४९८ र ५७१ जनाको मृत्यु भएको तथ्याङ्क छ । 

त्यसैगरी दुर्घटनामा घाइते हुने क्रमशः एक हजार ८६७, ६ हजार चार र नौ हजार ४६४ रहेको प्रतिवेदन उल्लेख छ । पछिल्ला वर्षमा दुर्घटना, घाइते र मृतक बढेका प्रतिवेदनले देखाएको छ । ट्राफिक प्रहरीले दुर्घटना न्यूनीकरण गर्न सघन जाँच र सचेतना कार्यक्रम बढाउँदै लगिएको जनाइएको छ । 

प्रदेशका आठवटै जिल्लामा ट्राफिक सचेतनाका कार्यक्रम निरन्तर आयोजना गरिएका र यस्ता कार्यक्रममा सवारी धनी, सवारी चालक, विद्यार्थी र बाटो हिँड्ने यात्रीलाई सामेल गर्ने गरिएको प्रनाउ भण्डारी बताउँछन् । योबाहेक राजमार्ग र सहायक मार्गमा छड्के र नियमित जाँचसँगै कारबाही पनि बढाइएको छ ।

“६ महिनामै एक लाख ४६ हजार १८० वटा (दोहोरिएकासमेत) सवारी साधनलाई कारबाही गरेका छौँ । यसबाट रु १० करोड ७७ लाख १५ हजार ५०० राजस्व सङ्कलन भएको छ,” प्रनाउ भण्डारी भन्छन्, “विगत वर्षभन्दा जारी आवको ६ महिनाको दुर्घटना र मानवीय क्षतिको सङ्ख्या अर्धवार्षिक अनुपातमा हेर्दा बढेकै छ ।” 

आव २०७६÷७७ मा एक लाख ९१ हजार ५२६, आव २०७७÷७८ मा दुई लाख ५९ हजार १८८ र आव २०७८÷७९ मा दुई लाख ६४ हजार ३१० सवारी साधन जाँचको क्रममा कारबाहीमा परेका थिए । 

ती वर्षमा क्रमशः १२ करोड १६ लाख ६८ हजार ५००, १९ करोड १६ लाख ३७ हजार र २२ करोड ४४ लाख ४० हजार ५०० राजस्व सङ्कलन गरिएको तथ्याङ्क छ । दुर्घटना र क्षति न्यूनीकरण गर्न समाजका सबै वर्ग, यात्रु, सवारीसाधन धनी र चालकमा सचेतता र जिम्मेवारीबोध बढ्न आवश्यक रहेको जनाइएको छ । रासस