विराटनगर । विराटनगर महानगरपालिकाले विराटनगरको विकासमा महत्त्वपूर्ण मानिएको प्रमुख चार परियोजना निर्माण गर्न ठेक्का प्रक्रिया अघि बढाएको छ । तीमध्ये दुई परियोजना विराट राजाको इतिहाससँग सम्बन्धित छन् ।

विराटकालीन सभ्यता र राजा विराटको इतिहाससँग जोडिएका दुई पोखरीको पुनर्निर्माण गर्न १० करोड रुपैयाँमा निर्माण कम्पनीलाई स्वीकृति दिइएको छ । विराटनगर महानगरपालिका–१४ स्थित रानीपोखरी र मन्टापोखरी संरक्षणसहितको कार्य अघि बढाउन लागिएको हो । दुवै पोखरीमा हरियाली पार्कसहितका संरचना निर्माण गरिनेछ ।

यस क्षेत्रलाई संरक्षण र सांस्कृतिक पर्यटकीय क्षेत्रका रूपमा विकास गर्न पूर्वमेयर भीम पराजुलीको पालामा विस्तृत परियोजना प्रतिवेदन तयार भई बजेट समेत विनियोजन गरिएको थियो । ती काम थाल्न ठेक्का दिने कार्य अघि बढाइएको विराटनगर महानगर कार्यालयले जनाएको छ ।

रानीपोखरी ग्रीनपार्क निर्माण गर्न विराटनगरको कला विल्डर्सले कबोल गरेको चार करोड ५४ लाख ७६ रुपैयाँ र सोही विल्डर्सले मन्टापोखरी ग्रीनपार्कमा कबोल गरेको पाँच करोड ४४ लाख २८ हजार स्वीकृत भएको छ । सोही क्षेत्रमा पर्ने विराट राजाको दरबार संरक्षण, आधुनिकीकरण र पर्यटकीय गन्तव्यस्थल बनाउन विस्तृत परियोजना प्रतिवेदन पराजुलीकै पालमा तयार भइसकेको छ ।

विराट दरबार उत्खननसहित यसलाई धार्मिक पर्यटकीय क्षेत्रका रूपमा विकास गर्न प्रदेश नम्बर–१ सरकारले समेत चासो दिँदै आएको छ । “हाम्रो पालामा महानगर र प्रदेश सरकारले सँगै कसरी काम गर्न सकिन्छ भनेर पनि छलफल भएको थियो,” पूर्वमेयर पराजुलीले भने ।

विराटनगरको सिंघिया तटमा साँझको सन्ध्या आरतीस्थल निर्माण गर्न तीन करोड ५० लाख ९३ हजार रुपैयाँमा ठेक्का स्वीकृत भएको छ । पूर्वमेयर पराजुलीले पशुपतिनाथको मन्दिरमा जस्तै सन्ध्या आरती गराउँदा विराटनगरमा धार्मिक पर्यटकको संख्या बढ्ने अपेक्षासहित आफूले विस्तृत परियोजना प्रतिवेदन तयार गरेको बताए ।

आरतीस्थल विराटनगर–२ स्थित हनुमान मन्दिरनजिकै सिंघिया घाटमा निर्माण गरिनेछ ।

प्राविधिक शिक्षा दिलाउन सुरु गरिएको महानगर बहुप्राविधिक शिक्षालयको संरचना निर्माण गर्न सात करोड ८९ लाख ४२ हजार १०५ रुपैयाँको ठेक्का छ । यो संरचना विराटनगर– ५ मा निर्माण गरिनेछ । अहिले जनता विद्यालयको भवनमा महानगरको प्राविधिक शिक्षालय सञ्चालनमा छ ।