लन्डन । बेलायतका पूर्व प्रधानमन्त्री बोरिस जोन्सनले रुसले युक्रेनमा आक्रमण गर्नुअघि एक असाधारण प्रकृतिको फोन कलका क्रममा रुसी राष्ट्रपति भ्लादिमिर पुटिनले आफूलाई क्षेप्यास्त्र प्रहार गर्ने धम्की दिएको बताएका छन् ।
जोन्सनले भनेका छन्, “पुटिनले क्षेप्यास्त्र प्रहार गर्न एक मिनेट मात्रै लाग्ने बताएका थिए । मैले युद्ध 'पूर्ण विपत्ति' हुनसक्ने चेतावनी दिएलगत्तै उनले त्यसो भनेका थिए ।"
बर्सौंबीच पुटिनले विश्वका नेताहरूसँग गरेका अन्तरक्रियामाथि बनाइएको एउटा बीबीसी वृत्तचित्रमा यो दाबी गरिएको हो । तर, क्रेमलिनका प्रवक्ताले यसलाई झुठो संज्ञा दिएका छन् ।
जोन्सनले पुटिनलाई युक्रेनमाथि आक्रमण गर्दा पश्चिमी प्रतिबन्ध लाग्ने र रुसी सीमानामा उत्तर एटलान्टिक सन्धि संगठन (नेटो) का थप फौज तैनाथ हुनसक्ने चेतावनी दिएका थिए ।
उनले रुसी सैनिक कारबाही रोक्ने प्रयास स्वरूप पुटिनलाई युक्रेनले सम्भावित भविष्यका लागि नेटोमा प्रवेश नगर्ने समेत बताएका थिए ।
बीबीसीबाट ।