नयाँदिल्ली । विधायक तथा भारतको प्रमुख विपक्षी कांग्रेस पार्टीका वरिष्ठ नेता राहुल गान्धी भारतको चार हजार किलोमिटर लामो “एकता मार्च”को अन्त्यमा पुगेका छन् । दक्षिणी राज्य तमिलनाडुको कन्याकुमारीबाट सुरु भएको पाँच महिना लामो यो मार्च जम्मु काश्मिरको राजधानी श्रीनगरमा आएर समाप्त भएको छ ।
यस मार्चले मुलुकभर भिडलाई आकर्षित गरेको छ । यसमा थुप्रै सलेब्रेटीले पनि सहयोग र समर्थन गरेका बीबीसीले लेखेको छ ।
राजनीतिक विश्लेषकहरुले यो अभियान मतमा अनुवाद हुने हो वा होइन भन्ने स्पष्ट नभएको बताएका छन् । गान्धीले “भारत जोडो यात्रा” नामक यस मार्चको उद्देश्य भारतीयहरुलाई समाजमा फैलिएको घृणा र भयविरुद्ध एकजुट गर्नु रहेको बताएका छन् ।
राजनीतिक विश्लेषकका अनुसार सन् २०१४ मा प्रधानमन्त्री नरेन्द्र मोदी भारतको सत्तामा आएयता खस्किँदै गएको कांग्रेस पार्टीको आत्मालाई पुनर्जीवित गर्नु पनि यस मार्चको उद्देश्य रहेको छ ।
सोमबार अपरान्ह श्रीनगरको एउटा रंगशालामा एक र्यालीसँगै यो मार्च टुँगिएको हो । यस मार्चमा राहुल गान्धी र अन्य थुप्रै कांग्रेस नेताहरुलगायत एकता प्रदर्शनका लागि अन्य केही विपक्षी पार्टीहरुले पनि सहभागिता जनाएका हुन् ।
र्यालीलाई सम्बोधन गर्ने क्रममा गान्धीले भनेका छन्, “मलाई स्थानीय प्रशासनले पदयात्रा गर्दा ममाथि ग्रिनेड फ्याँकिन सक्छन् भन्दै चेतावनी दिएको थियो । मैले हिँड्ने नै अडान लिएँ । किनभने, मेरो परिवार र महात्मा गान्धीले मलाई निडर भएर बाँचिन्न भने बाँच्नुको अर्थ नहुने भनेर सिकाएका छन् ।”