काठमाडौं । साताको दोस्रो कारोबार दिन सोमबार नेप्से परिसूचक ४१.०१ अंक घटेर बन्द भएको छ । आइतबार साढे १४ अंक घटेको नेप्से सोमबार पनि घटेर २१२७.५२ विन्दुमा रोकिएको हो ।
घटेको बजारमा एक दर्जनभन्दा बढी कम्पनीको सेयर मूल्य ५ प्रतिशतभन्दा बढीले घटेको छ । मूल्य घटेसँगै यी कम्पनीका लगानीकर्ताले सर्वाधिक गुमाएका छन् । सर्वाधिक सेयर मूल्य घट्नेमा युनाइटेड इदी मार्दी आरबी हाइड्रोपावरको सेयर मूल्य सर्वाधिक घटेको छ । यो कम्पनीको सेयर मूल्य ७.१४ प्रतिशतले घटेको छ ।
आज लुम्बिनी जनरल इन्स्योरेन्स र आदर्श लघुवित्त वित्तीय संस्थाको सेयर मूल्य १० प्रतिशतले वृद्धि भएको छ । आदर्शको सेयर मूल्य प्रतिकित्ता एक हजार ४४९ रुपैयाँ ३० पैसा कायम भएको छ ।
आज २५६ धितोपत्रको ८८ लाख ३६ हजार ४८८ कित्ता सेयर तीन अर्ब ३० करोड २२ लाख रुपैयाँमा खरिद–बिक्री भएको छ । सर्वाधिक मूल्यको सेयर खरिद–बिक्री सूर्यज्योति इन्स्योरेन्सको भएको छ । यो कम्पनीको १७ करोड ६५ लाख रुपैयाँको सेयर खरिद–बिक्री भएको छ ।
कारोबारमा आएका १३ वटै समूहको परिसूचक घटेको छ । सर्वाधिक परिसूचक घट्नेमा होटेल तथा पर्यटन समूह रहेको छ । यो समूहको परिसूचक ३.६१ प्रतिशतले घटेको छ ।