विराटनगर । विकल्प बिनै विराटनगर महागनरपालिकाले सहरी क्षेत्रका सडकलाई नो–पार्किङ जोन घोषणा गरेपछि व्यवसायीहरू आन्दोलनमा उत्रिएका छन् । मेनरोड, जलजला मोड, महावीर रोडसहितका सडकमा सवारी साधन राख्न नपाइने भन्दै विराटनगर महानगरले सडकमा रोक्न निषेध लेखिएका बार्डहरू राखेको छ । यसको विरोधमा सोमबार बजार क्षेत्रका व्यापारी व्यवसायीले पसल बन्द गरी महागनरविरुद्ध प्रदर्शन गरेका छन् ।
यता, महानगरले भने व्यक्तिका निजी जग्गामा शुल्क तिरेर सवारी राख्न सक्ने गरी व्यवस्थापनको तयारी गरिरहेको जनाएको छ । कतिपय स्थानमा विकल्प पर्याप्त नभएको व्यवसायी सुनील रजकले बताए । “हामीले सडकमै एकतर्फी रुपमा सवारी अड्याउन अथवा सडकमा एकतर्फी रुपमा मात्र सवारी आउजाउ गर्न दिइनुपर्ने माग गरेका हौं,” उनले भने, “पार्किङको बाहना गरेर महानगरले हाम्रो गरिखाने बाटो नै बन्द गर्ने षडयन्त्र गरिरहेको छ ।”
निजी जग्गा भएका केहीले शुल्क तिरेर पार्किङ गर्न सक्ने भने पनि ती स्थान पायक नभएकाले ग्राहक आउन छाडेको रजकले सुनाए । उपभोक्ताले पटक–पटक पैसा तिर्न नमान्ने हुँदा आफूहरूको व्यापारसमेत चौपट भएको उनको दाबी छ ।
खुद्रा व्यापार संघ मोरङका अध्यक्ष संजय मण्डलले महानगर व्यापारी व्यवसायीप्रति अनुदार भएको बताउँदै भने, “अहिले त्यसै व्यापार व्यवसाय चौपट भएको अवस्थामा महानगरको जबरजस्तीले हामी थप मारमा परेका छौँ ।” मण्डलले यस विषयमा महानगरका मेयर नागेश कोइरालालाई ध्यानाकर्षण गराए पनि आफूहरूको मागको सुनुवाइ नभएको गुनासो गरे ।
विराटनगरका व्यापारीहरूले बिहानदेखि पसल र व्यवसाय बन्द गरी मुख्य बजार क्षेत्रमा प्रदर्शन गरिरहेका छन् । महानगर क्षेत्रको पार्किङ व्यवस्थापन र खाली जग्गाको व्यवस्थापनको जिम्मेवारी पाएको अधिकृत पुनम दाहालले हाललाई जलजला हलदेखि अस्पताल मोड, कोसी अस्पतालदेखि शनिमन्दिर चोक, शनिमन्दिर चोकेदेखि गुदरीको बिजुली सडक, जलजलादेखि ट्राफिक चोकसम्म, गुदरीको ‘ए’ र ‘बी’ प्लट पंचमुखी मन्दिरदेखि गुदरी हाइवेसम्म पार्किङ निषेध गरिएको जानकारी दिए ।
तत्काललाई पार्किङको व्यवस्थापन ग्रिनक्रस अस्पतालदेखि दक्षिणको खाली जमिन, जलजला हल अगाडिको ६ कठ्ठा जमिन, गुदरी इप्लटको १० कठ्ठा जग्गा, त्यसकै छेउ उत्तरपट्टी शोभा मास्केको चार कठ्ठा जग्गा छनोट गरिएको दाहालले बताए । “अरु थप ठाउँको पनि खोजी भइरहेको छ”, उनले भने ।