काठमाडौं । राष्ट्रिय स्वतन्त्र पार्टीका सभापति रवि लामिछानेले प्रधानमन्त्री पुष्पकमल दाहाल 'प्रचण्ड'सँग भेटवार्ता गरेका छन् ।
आइतबार दिउँसो जिल्ला प्रशासन कार्यालयबाट नागरिकता लिएका रविले साँझ बालुवाटार पुगेर प्रधानमन्त्रीसँग भेटवार्ता गरेका हुन् ।
भेटमा पछिल्लो राजनीतिक घटनाक्रमसहित रिक्त रहेको गृहमन्त्रालयबारे छलफल भएको स्रोतले जनाएको छ ।
स्रोतका अनुसार रविले फेरि गृहमन्त्रालय फर्किने चाहना व्यक्त गरेका छन् । तर, प्रधानमन्त्रीले भने स्पष्ट जवाफ दिइसकेका छैनन् ।
शुक्रबार सर्वोच्च अदालतले नागरिकता अवैध ठहर गरेपछि उनको सांसद पद खारेज भएको थियो । उनी शुक्रबार नै उपप्रधान तथा गृहमन्त्त्रीबाट राजीनामा दिएर सिंहदरबारबाट बाहिरिएका थिए ।
तर, आज उनले जिल्ला प्रशासन कार्यालय काठमाडौंबाट नागरिकता पाइसकेका छन् ।
संविधानको धारा ७८ (१) अनुसार प्रधानमन्त्रीको सिफारिसमा गैरसांसद पनि मन्त्री बन्न पाउँछन् । तर, त्यसरी नियुक्त भएका मन्त्रीले ६ महिनाभित्र संसद्को सदस्यता प्राप्त गर्नुपर्छ ।
