तेहरान । इरानको रक्षा मन्त्रालयले इस्फाहान सहरस्थित एउटा सैनिक परिसरमा भएको ड्रोन आक्रमणलाई विफल पारिएको दाबी गरेको छ । मन्त्रालयले आक्रमणमा तीनवटा ड्रोन संलग्न रहेको र यसमा कुनै मानवीय क्षति नभएको पनि जनाएको छ ।
मन्त्रालयले अगाडि भनेको छ, “एउटा ड्रोनलाई वायु प्रतिरक्षा प्रणालीबाट ध्वस्त पारिएको थियो । अन्य दुईवटा ड्रोनलाई 'प्रतिरक्षा जाल'मा पारेर समातिएको थियो । यस कार्यको दौरान एउटा भवनमा सामान्य क्षति भएको छ ।"
बीबीसीले आक्रमणबाट भएको क्षतिको पूर्ण विवरण पुष्टि गरेको छैन । अहिलेसम्म कसैले पनि आक्रमणका लागि जिम्मेवारी लिइसकेको छैन ।
इरानका विदेशमन्त्री होस्सेन आमिर–अब्दोल्लाहियानले भनेका छन्, “मुलकमा अस्थिरता ल्याउने प्रयास स्वरूप यो कायरतापूर्ण घटना घटाइएको हो । तर यस घटनाले इरानको शान्तिपूर्ण ढंगले आणविक विकास गर्ने चहना र दृढतालाई कुनै प्रभाव पार्ने छैन ।"
इरानको आणविक कार्यक्रम र युक्रेनमाथि आक्रमण गरिरहेका रुसलाई हातहतियार आपूर्ति गरेको कारण तनाव चर्किरहेका अवस्था यो ड्रोन आक्रमण भएको हो ।
मुस्लिम पोशाकको नियम तोडेको आरोपमा पक्राउ परेकी एक महिलाको प्रहरी हिरासतमा मृत्यु भएको विषयलाई लिएर पछिल्ला महिनामा इरानमा व्यापक विारेध प्रदर्शनका घटना भइरहेका छन् ।
इरानी सरकारी सञ्चार माध्यमलाई उपलब्ध गराइएको एक विज्ञप्तिमा रक्षा मन्त्रालयले स्थानीय समय अनुसार शनिबार राति करिब ११ बजेर ३० मिनेट जाँदा ड्रोन आक्रमण भएको उल्लेख गरेको छ ।
बीबीसीबाट ।