काठमाडौं । नियुक्तिको प्रक्रियामै रहेका मोन्टी देसाईले आइतबारदेखि नेपाली राष्ट्रिय क्रिकेट टिमको प्रशिक्षण थालेका छन् ।

क्यानले गएको पुस २४ गते मुख्य प्रशिक्षकका लागि आवेदन खुलाएको थियो । माघ १८ गते क्यानले आफ्नो फेसबुक पेजमा मुख्य प्रशिक्षक छनोट समितिलाई उद्धृत गर्दै २४ जनाको आवेदन परेको र त्यसबाट पाँचजनालाई अन्तर्वार्तामा बेलाइएको जनाएको थियो । छनोट समितिले मुख्य प्रशिक्षकमा देसाईको नाम सिफारिस गरेको थियो ।

क्यानले माघ ११ गते मुख्य प्रशिक्षकको नाम सार्वजनिक गर्ने तयारी गरेको थियो । तर, राष्ट्रिय खेलकुद परिषद् (राखेप)बाट स्वीकृति लिनुपर्ने प्रक्रिया पूरा नभएकाले क्यानले अझै नाम सार्वजनिक गर्न सकेको छैन । विदेशी प्रशिक्षक नियुक्त गर्दा राखेपबाट स्वीकृति लिएपछि मात्र श्रम स्वीकृति लिने प्रक्रिया अघि बढ्छ । 

“सबै प्रक्रिया पूरा भएको छ । राखेप कार्यकारी समिति बैठक बसेर निर्णय गर्न बाँकी छ । सोमबार बस्ने राखेप कार्यसमितिको बैठकले निर्णय गरेर मन्त्रालय पठाउनेछ,” राखेपका खेलकुद विकास विभाग प्रमुख प्रेमबहादुर मल्लले भने । 

राष्ट्रिय खेलकुद विकास ऐनको दफा ४४ को उपदफा २ अनुसार राष्ट्रिय खेल संघ वा प्रदेश र स्थानीयस्तरका खेलसम्बन्धी संस्था वा निकाय तथा संघले विदेशी सरकार, अन्तर्राष्ट्रिय संघ संस्था, विदेशी संस्था वा व्यक्तिसँग सम्झौता गर्दा राष्ट्रिय खेलुकद परिषद्मार्फत सरकारको स्वीकृति लिनुपर्ने हुन्छ ।

क्यानकै बोर्ड सदस्यहरूले मुख्य प्रशिक्षक नियुक्तिमै त्रुटि भएको आरोप लगाएका छन् । उनीहरूले छनोट समितिलाई कार्यकारी अधिकार नभएको र प्रशिक्षक नियुक्ति बोर्ड बैठकबाट निर्णय गर्नुपर्ने बताएका छन् । क्यानको बोर्ड बैठक माग १७ गते पोखरामा बस्ने भनिएको छ ।

क्यानले माघ १३ गते आईसीसी क्रिकेट विश्वकप लिग–२ का लागि २८ खेलाडीलाई बन्द प्रशिक्षणमा बोलाएको छ । आईसीसी क्रिकेट विश्वकप लिग–२ अन्तर्गत नेपाल, नामिबिया र स्कटल्यान्डबीचको खेल फागुन २ गतेबाट नेपालमै हुँदै छ । आईसीसी एकदिवसीय विश्वकप छनोट तथा एकदिवसीय अन्तर्राष्ट्रिय मान्यता कायम राख्नका लागि यस प्रतियोगिता महत्त्वपूर्ण छ । 

नेपाल २४ खेलबाट १८ अंक जोड्दै छैटौँ स्थानमा छ । नेपालको भारतमा हुने विश्वकप छनोटको सम्भावना न्यून छ । एकदिवसीय अन्तर्राष्ट्रिय मान्यता जोगाउनका लागि बाँकी खेल महत्त्वपूर्ण छ । त्यसमाथि नेपालको घरेलु मैदानमा हुने खेल अझै महत्त्वपूर्ण छ ।

तस्बिरहरू : हरिशजंग क्षेत्री/बाह्रखरी