काठमाडौं । राष्ट्रिय स्वतन्त्र पार्टीले गृहमन्त्रालय आफूहरुको भागमा परेको हुँदा छाड्न नसकिने निस्कर्ष निकालेको छ ।
केन्द्रीय समितिको बैठकले यस्तो निष्कर्ष निकालेको हो । बैठकले रवि लामिछानेलाई केन्द्रीय समितिमा मनोनीत गर्दै सभापतिमा चयन गरेको थियो ।
“हामीले गृह मन्त्रालय नपाउने भन्ने हुँदैन,” प्रवक्ता मुकुल ढकालले भने, “हामीमा आएको समस्या थियो । हामीले समाधान पनि गरेका छौँ ।”
उनले रवि लामिछानेलाई केन्द्रीय सदस्यमा मनोनयन गर्ने निर्णय गर्दै पछि सभापतिमा चयन गरेको जानकारी दिए ।
“पार्टी सभापतिमा रवि लामिछाने चयन हुनुभएको छ,” उनले भने, “जुन समस्या हामीकहाँ आएको थियो, करिब समाधान गरेका छौँ । अन्य दलले आफ्नो तरिकाले बुझ्न जरुरी छैन । गृह मन्त्रालय हामीले पाएका हौँ । यो कुराको बारेमा दलका अन्य सभापति र अध्यक्षलाई भेट्नुहुन्छ । सभापतिलाई अधिकार दिएका छौँ । गृहमा हाम्रो दाबी हो । बाँडफाँटको समयमा हामीले पाएका हौँ । पुनः दाबी गर्न पर्दैन स्वतः पाउनुपर्छ ।”
उनका अनुसार पार्टीले गृह मन्त्रालयमा जसलाई पनि पठाउन सक्ने बताए ।
