काठमाडौं । इङ्लिस प्रिमियर लिगको क्लब चेल्सीले लियोनका राइट ब्याक १९ वर्षे मालो गुस्तोलाई तीन करोड ५० लाख युरोमा अनुबन्ध गरेको छ । 

गुस्तोले चेल्सीसँग २०३० सम्मका लागि सम्झैता गरेका हुन् । तर, गुस्तोले जारी सिजन भने लियोनमै बिताउनेछन् । लियोनले ५० लाख युरो एडअन कन्डिसन रहेको बताएको छ । 

गुस्तोले जनवरी २०२१ मा लियोनबाट डेब्यू गरेका थिए । उनले फ्रेन्च लिग वानको क्लब लियोनबाट जारी सिजन १५ खेल खेलेका छन् । लियोन अहिले नवौँ स्थानमा छ । 

चेल्सीले यस जनवरीमा नोनी मादुके, मेखाइलो मुद्रेक, डेबिड डट्रो फोफाना, एन्ड्रे सान्तोस र बेनोइट बाडिएसिललाई अनुबन्ध गरेको छ । त्यस्तै, एट्लेटिको मड्रिडका फरवार्ड जाओ फेलिक्सलाई लोनमा अनुबन्ध गरेको छ । 

सबैलाई गरी चेल्सीले यस ट्रान्सफर विन्डोमा १६ करोड पाउण्ड खर्च गरेको छ ।