काठमाडौं । थाइल्यान्डको बैंककमा सम्पन्न एएसबीसी एसियन यू–२२ बक्सिङ च्याम्पियनसिपमा ऐतिहासिक रजतपदक जित्न सफल सुष्मा तामाङलाई नगद २५ हजार रुपैयाँसहित सम्मान गरिएको छ । सिरीष फाउन्डेसनले सम्मान गरेको हो ।
सुष्मा प्रतियोगिताको फाइनलमा उज्वेकिस्तानकी फोजिलोभा फरजोनासँग अंकका आधरमा ५ः० ले पराजित भएकी थिइन् । सुष्माले महिला ४८ किलो तौल समूहमा प्रतिस्पर्धा गरेकी थिइन् ।
एसियालीस्तरमा कुनै पनि उमेर समूहमा नेपाली बक्सिङ खेलाडीले रजतपदक जितेको त्यो पहिलोपटक हो । यसअघि, एसियन गेम्समा नेपाली खेलाडीले कास्यपदक जितेका थिए ।
सुष्माले यस्तो सम्मानले आउँदा दिनमा अझ राम्रो गर्नका लागि उत्प्रेरणा मिलेको बताइन् । उनले भनिन्, “मैले पहिले पनि दुई–तीनवटा अन्तर्राष्ट्रिय प्रतियोगिता खेलिसकेको थिएँ । जसका कारण यस प्रतियोगितामा पनि सहज भयो । मैले पहिलो खेलमा भियतनामको खेलाडीविरुद्ध खेलेकी थिएँ । त्यसपछि मंगोलियाको खेलाडीसँग खेलेको थिएँ । मंगोलियाका खेलाडीसँग प्रतिस्पर्धा गरेँ । उज्वेकिस्तानकी खेलाडी एसियन च्याम्पियन हुन् । फाइनलमा पराजित भए पनि मलाई आगामी प्रतियोगिताका लागि प्रेरणा मिलेको छ ।”
सिरीष फाउन्डेसनले सुष्मालाई यसअघि छात्रावृत्ति प्रदान गरेको थियो ।