काठमाडौं । नेपाल क्रिकेट संघ (क्यान)का सात केन्द्रीय सदस्यले नेपाल ट्वान्टी–२० लिगका क्रममा भएका सम्पूर्ण विवादको जिम्मेवारी अध्यक्ष चतुरबहादुर चन्दलगायत कार्यसम्पादन समितिले लिनुपर्ने भन्दै राजीनामाको माग गरेका छन् ।

गएको पुस ९ देखि २७ गतेसम्म कीर्तिपुरस्थित त्रिवि क्रिकेट मैदानमा भएको उक्त लिगमा ‘स्पट फिक्सिङ’ भएको बताइएको छ । साथै, क्यानले भारतीय कम्पनी सेभेन थ्री स्पोर्ट्सलाई व्यावसायिक तथा रणनीतिक साझेदार बनाउनका लागि गरिएको सम्झैता पनि गैरकानुनी भएको बताइएको छ । क्यानले सेभेन थ्री स्पोर्ट्ससँग आठ वर्षको सम्झौता गरेको थियो ।

राष्ट्रिय खेलकुद परिषद् (राखेप)ले बनाएको छानबिन समितिले क्यान र भारतीय कम्पनीबीच भएको सम्झैता गैरकानुनी भएको ठहर गरेको छ ।

यस्तै, नेपाल प्रहरीको केन्द्रीय अनुसन्धान ब्युरो (सीआईबी)को टोलीले प्रतियोगितामा स्पट फिक्सिङ भएको भन्दै दुई खेलाडीलाई पक्राउ गरिसकेको छ ।

क्यानका सात सदस्यले आफूहरूले यस विषयमा पटक–पटक प्रश्न उठाए पनि नेतृत्वले बेवास्ता गरेको बताएका छन् । “भारतीय कम्पनीको पृष्ठभूमि शंकास्पद देखिएको तथा सम्झौता गर्नुअघि ग्लोबल टेन्डरमार्फत गर्नुपर्नेमा हामी स्पष्ट थियौँ । जसका कारण हामीले लिगको विषयमा पटक–पटक नोट अफ डिसेन्ट समेत लेखेका थियौँ,” सात सदस्यले जारी गरेको विज्ञप्तिमा उल्लेख छ, “हामीले क्यान नेतृत्वको गलत कार्यको निरन्तर औपचारिक मञ्चमा पनि विरोध गर्‍यौँ । साझेदार कम्पनी नै फिक्सिङमा संलग्न हुनुको मुख्य दोष क्यान नेतृत्वको हो । त्यसमा पनि महत्त्वपूर्ण निर्णय गर्ने क्यानको कार्यसम्पादन समितिने प्रमुख दोषी हो । क्यान नेतृत्व र कार्यसम्पादन समिति स्पट फिक्सिङको दोषबाट भाग्न सक्दैन । हामी केन्द्रीय सदस्यहरू उहाँहरूको राजीनामा  जोडदार रूपमा माग गर्छौँ ।”

आयोजनाको सम्पूर्ण जिम्मेवारी लिएको भारतीय कम्पनीका प्रमुख जतिन अहलुवालिया प्रतियोगिताको बीचमै भागेर भारत गएका थिए । त्यसलाई क्यान नेतृत्वले पनि स्वीकार गरेको छ । गएको बिहीबार क्यानका अध्यक्ष चतुरबहादुर चन्द, कार्यवाहक सचिव प्रशान्तविक्रम मल्ल र कोषाध्यक्ष रोशन सिंहले पत्रकार सम्मेलन गर्दै उक्त लिग सञ्चालनका क्रममा गल्ती भएको स्वीकार गरेका थिए ।

क्यानका सात सदस्यले नेतृत्वले जानाजान गल्ती गरेको आरोप लगाएका छन् । उनीहरूले भनेका छन्, “हामीले पटक–पटक सचेत गराएका थियौँ । तर, उहाँहरूले जर्बरजस्ती निर्णय गर्नुभयो । यसले नेपाल क्रिकेटको मानमर्दन भएको छ । हामीले पटक–पटक सचेत गराउनका बाबजुद त्यही कम्पनीलाई नेपाली क्रिकेट सुम्पिने हठ गर्ने नेतृत्व अहिले आएर माफी मागेको भरमा पन्छिन मिल्दैन र सरोकारवाला निकायले पनि नेपालि क्रिकेटलाई बेटिङ र फिक्सिङको उर्भर भूमिका रूपमा अन्तराष्ट्रिय मञ्चमा बदनाम गराउनेहरूलाई उन्मुक्ति दिन छुट छैन ।”

उनीहरूले क्यान कार्यसम्पादन समितिमा रहेका चतुरबहादुर चन्द, प्रशान्तविक्रम मल्ल, रोशन सिंह, दुर्गाराज पाठक र पदक खड्काले नैतिकताको आधारमा राजीनामा दिनुपर्ने माग गरेका छन् ।

यस्तै, नेपाल ट्वान्टी–२० लिगको गभर्निङ काउन्सिलका संयोजक प्रशान्तविक्रम मल्ल, सदस्यहरू दुर्गाराज पाठक, भानुभक्त सिग्देल, अशोक मल्होत्रा र सेभेन थ्री स्पोर्ट्सका प्रमुख जतिन अहलुवालियालाई पनि कारबाहीको दायारामा ल्याउनुपर्ने उनीहरूको माग छ ।