काठमाडौं । स्पेनका युवा मिडफिल्डर पेड्रीले बार्सिलोनाबाट आफ्नो १००औँ खेललाई सुखद बनाएका छन् । पेड्रीले बेन्चबाट आएर गरेको गोलमा बार्सिलोनाले शनिबार राति स्पेनिस ला लिगामा जिरोनालाई १–० ले हराएको छ । यससँगै बार्सिलोनाले शीर्ष स्थानमा ६ अंकको अग्रता लिन सफल भएको छ ।
२० वर्षे मिडफिल्डर पेड्रीले ६१औँ मिनेटमा गरेको गोल बार्सिलोनाको जितमा निर्णायक बन्यो । पेड्री २६औँ मिनेटमा औसमाने डेम्बेलेको स्थानमा मैदान छिरेका थिए । डेम्बेले घाइते भएपछि पेड्री मैदान छिरेका हुन् ।
जितपछि बार्सिलोनाले १८ खेलबाट ४७ अंक जोडेको छ । जुन दोस्रो स्थानको रियाल मड्रिडभन्दा ६ अंकले आगडि हो । तथापी साविक विजेता रियालले एक खेल कम खेलेको छ । रियालले आज रियाल सोसिडाडविरुद्ध खेल्नेछ । पराजित जिरोना २१ अंकका साथ १२औँ स्थानमा छ ।
गएराति सेभियाले इल्चेलाई ३–० ले हरायो । जितपछि २१ अंक जोडेको सेभिया १३औँ स्थानमा भने इल्चे अंक तालिकाको पुछारमा छ । कार्डिजले मायोर्कालाई २–० ले हराएको छ भने अल्मेरियाले स्पानियोलाई ३–१ ले हरायो । त्यस्तै रियाल बेटिसले गेटाफेलाई १–० ले पराजित गर्यो ।