काठमाडौं । प्रधानमन्त्री पुष्पकमल दाहाल ‘प्रचण्ड’ले अहिले तीन मन्त्रालयको जिम्मेवारी सम्हालेका छन् । प्रधानमन्त्री तथा मन्त्रिपरिषद्को कार्यालयबाहेक उनले वन तथा वातावरण, युवा तथा खेलकुद र गृह मन्त्रालयको जिम्मेवारी सम्हालेका हुन् ।
मन्त्रिपरिषद् विस्तारपछि उनले दुई मन्त्रालय आफूसित राखेका थिए । शुक्रबार रवि लामिछानेले उपप्रधान एवं गृहमन्त्रीबाट राजीनामा दिएपछि त्यसको कार्यभार पनि प्रधानमन्त्रीले सम्हालेका हुन् ।
यही माघ ३ गते मन्त्रिपरिषद् विस्तार गरिएको थियो । प्रधानमन्त्रीले वन तथा वातावरण र युवा तथा खेलकुद मन्त्रालय आफैँसित राखेका थिए । त्यति बेला तीन राज्यमन्त्रीसहित २३ सदस्यीय मन्त्रिपरिषद् बनाइएको थियो । लामिछानेको बहिर्गमनसँगै अहिले मन्त्रिपरिषद् २२ सदस्यीय छ ।
गएको पुस १० गते प्रचण्ड तेस्रोपटक प्रधानमन्त्रीमा नियुक्त भएका थिए । त्यसको भोलिपल्ट आठ सदस्यीय मन्त्रिपरिषद् गठन गरी उनले पद तथा गोपनीयताको शपथ लिएका थिए ।